Moskva, 12 noyabr (AZƏRTAC). Rusiyada çıxan “Nevskoye vremya” qəzetində bu nəşrin baş redaktoru Andrey Petrovun Bakı Beynəlxalq Humanitar Forumuna həsr olunmuş “Bakı hamını barışdırmaq istəyir” sərlövhəli məqaləsi dərc olunmuşdur.

Müəllif yazır: “Bakı heyrətləndirmək iqtidarındadır: şəhər son illər o qədər gözəlləşib, xüsusi işıqlandırma sayəsində axşamlar nəhəng məşəlləri xatırladan müxtəlif formalı göydələnlərin sayı o qədər artıb, Xəzərin sahilini o dərəcədə yaraşıqlı edib ki, bəzən sanki Dubayı xatırladır. Bu günlərdə Bakı məni artıq üçüncü dəfə keçirilən Beynəlxalq Humanitar Forumunun vüsəti ilə təəccübləndirdi. Özünüz düşünün: Azərbaycan paytaxtına 70 ölkədən və beş beynəlxalq təşkilatdan təqribən 800 adam gəlmişdi. Onların arasında 7 sabiq dövlət başçısı, 13 Nobel mükafatı laureatı, 107 məşhur ictimai və siyasi xadim var idi. Dünyanın heç də bütün paytaxtları belə qələbəliyi yola vermək iqtidarında deyildir.

Andrey Petrov yazır ki, bəşəriyyəti narahat edən mühüm məsələlərə dair fikir mübadiləsi aparmaq, yeni elmi ideyalar irəli sürmək, yeni texnologiyalar, habelə sosial problemlərin həlli təcrübəsi ilə bölüşmək Azərbaycan Prezidenti İlham Əliyevin və Rusiya Prezidenti Vladimir Putinin həmsədrlik etdikləri forumun vəzifələridir. Ayrıca götürülmüş bir ölkədə və bütövlükdə dünyada mədəni fərqlərin saxlanılmasına və inkişaf etdirilməsinə yönəlmiş multikulturalizm ideologiyası builki forumun əsas mövzusu olmuşdur. Müəllif yazır ki, Prezident İlham Əliyev forum iştirakçılarına müraciətində bildirmişdir ki, multikulturalizm Azərbaycanın dövlət siyasətidir və Azərbaycan xalqı öz tolerantlığı ilə şöhrət qazanmışdır. Müəllif yazır: “Qeyd edim ki, mən bunu öz üzərimdə hiss etdim. Bakı küçələrində yerli adamlar tez-tez mənə yaxınlaşıb haradan gəldiyimi soruşurdular. Haradan gəldiyimi öyrənəndən sonra isə gülümsəyərək deyirdilər: “Salam, dost! Mən Peterburqda yaşamışam. Nəyə ehtiyacın varsa, de”. Özü də Biryulyevo hadisələrinin və Moskvada Orxan Zeynalovun saxlanılmasının əks-sədasının hələ sakitləşmədiyi günlərdə.

A.Petrov Rusiya Prezidenti Vladimir Putinin təbrik məktubundan sitat gətirmişdir: “Forum ildən-ilə öz sərhədlərini genişləndirir, Rusiyanın, Azərbaycanın, başqa dövlətlərin həyatında nəzərəçarpan, gözlənilən hadisəyə çevrilir”.

Məqalədə forumda müzakirə edilən mövzulardan - yoxsulluğa qarşı mübarizədən, islamafobiya təhlükəsindən, müxtəlif konfessiyaların və mədəniyyətlərin nümayəndələri arasında dialoqdan danışılır. Məqalədə deyilir: “Əlbəttə, Qarabağ mövzusu da müzakirə olundu. Azərbaycan Prezidenti dedi ki, “bizim beynəlxalq səviyyədə tanınan ərazilərimiz uzun illərdir Ermənistanın işğalı altındadır”, humanitar fəlakətlə üzləşib. Mixail Şvıdkoy bu sözlərə cavab olaraq qeyd etdi ki, Rusiya Azərbaycan və Ermənistan liderlərinin planlaşdırılan görüşündən əvvəl Dağlıq Qarabağ probleminin həllinə dair iki ölkənin ziyalılarının görüşünü keçirməyi təklif etmişdir. Mixail Şvıdkoy dedi: “İstənilən siyasi qərar qəbul etmək olar, lakin əgər Azərbaycan xalqı nə üçün bu və ya digər sazişi Ermənistan tərəfi ilə imzalamaq lazım gəldiyini başa düşməsə və ya əksinə olsa, onda həmin qərarlar yerinə yetirilməyəcəkdir”.

A.Petrov vurğulayır ki, “Forum iştirakçılarının Bakıda özlərini evdəki kimi hiss etmələri üçün mümkün olan hər şeyi etmişdir. Qonaqlar isə bu yaxınlarda yenidən Prezident seçilməsi münasibətilə onu təbrik edirdilər”.

A.Petrov Nobel mükafatı laureatları Klaus fon Klittsinq, Rudolf Artur Markus və Dan Şextmanın iştirakı ilə alternativ enerji mənbələrindən istifadə problemləri ilə bağlı müzakirələrdən danışarkən qeyd etmişdir ki, Azərbaycan külək enerjisindən istifadə etməklə, energetikada neft və qaz asılılığından yaxa qurtara bilər.

Məqalədə deyilir: “Kütləvi informasiya vasitələri problemləri forumda ayrıca müzakirə olunmuşdur. Prezident İlham Əliyev İnternetin inkişafını nəzərə almaqla, kütləvi informasiya vasitələrini dördüncü deyil, ikinci hakimiyyət adlandırmışdır”.

Müəllif Moskva Dövlət Universitetinin jurnalistika fakültəsinin professoru İqor Volqinin və İTAR-TASS Agentliyinin baş direktorunun birinci müavini Mixail Qusmanın çıxışlarından sitatlar gətirmişdir. Sitatlarda bu və ya digər hadisələrin işıqlandırılmasında KİV-lərin məsuliyyəti vurğulanır.

A.Petrov yazır ki, forumda bir yerdə toplaşmağı çətin olan insanlara təsadüf etmək olardı: Avstriya şahzadəsi Letisiya Reus, məşhur Azərbaycan rəssamı Tahir Salahov, Beynəlxalq Üzüm və Şərab Təşkilatının baş katibi Federiko Kastelluççi, Fransa aktyoru Rober Osseyn, Acarıstan Ali Sovetinin sədri Avtandil Beridze. Rusiya rəssamı Nikas Safronov, Amerika bəstəkarı Maykl Rot, Efiopiya parlamentinin sədri Abdulla Daqo, aktyor Emmanuil Vitorqan, macarıstanlı kosmonavt, Macarıstan və Sovet İttifaqı Qəhrəmanı Bertalan Farkaş.

Müəllif yazır: “Forum başa çatandan sonra təşkilatçılar bütün iştirakçıların Azərbaycanın müxtəlif şəhərlərinə - Naxçıvan, Qəbələ, Quba, Lənkəran və Gəncəyə səfərlərini təşkil etdilər. Mən Naxçıvanı seçdim və təəssüflənmirəm”. Naxçıvan təəssüratlarını heyranlıqla bölüşən A.Petrov yazır: “Səliqəli gözəl evlər, dəbdəbəli otellər (hələ on beş il əvvəl bütün ölkədə 10 münasib otel var idisə, hazırda onların sayı təxminən 500-dür), əla yollar, fəvvarələr, yaxın keçmişdə müşahidə olunan bərbad vəziyyətdən fərqli olan təmizlik”. A.Petrov Azərbaycan xalqının ümummilli lideri Heydər Əliyevin muzeyinə getməsindən söz açır. Xan sarayı, Nuhun bərpa olunmuş məqbərəsi, Əshabi-Kəhv və diyarın digər abidələri də jurnalistin marağına səbəb olmuşdur.

A.Petrov sonda yazır: “Azərbaycanda heyrətamiz dəyişikliklər baş vermişdir. Biz dinamik inkişaf edən iqtisadiyyat, cəmiyyətin bütün təbəqələrini əhatə edən rifah və xidmətlər, elmin və mədəniyyətin inkişafına yatırılan sanballı investisiyalar, nəzərəçarpan dünyəvilik görürük. Əgər bir ölkə “Piano Beltman” kimi dünya şöhrətli markanı yığıb istehsal edirsə, modern incəsənət muzeyi yaradırsa, nanotexnologiyaların inkişafına sərmayə yatırırsa, turizm infrastrukturunu intensiv inkişaf etdirirsə, deməli, bu ölkə gələcəyə baxır”.

Fəridə Abdullayeva

AZƏRTAC -ın xüsusi müxbiri

Moskva