NİKOLAY RYABOV: QARABAĞ PROBLEMİ MƏRHƏLƏ-MƏRHƏLƏ HƏLL OLUNMALIDIR
Bunu Rusiyanın Bakıdakı səfiri Nikolay Ryabov mətbuat konfransında bəyan etmişdir.
Respublika xarici işlər nazirinin müavini Xələf Xələfov Azərbaycan ilə Rusiya arasında diplomatik münasibətlər qurulmasının 10 illiyinə həsr olunmuş mətbuat konfransını açaraq vurğulamışdır ki, ölkələrimizin dostluq və əməkdaşlığının daha da möhkəmləndirilməsi regionda sülhə, sabitliyə və inkişafa kömək edir. Lakin Ermənistan-Azərbaycan, Dağlıq Qarabağ münaqişəsinin həll edilməməsi Qafqazda sülhə, sabitliyə və təhlükəsizliyə ciddi təsir göstərir. Xələf Xələfov ümidvar olduğunu söyləmişdir ki, Qafqaz dövləti kimi, ATƏT-in Minsk qrupunun həmsədrlərindən biri kimi və BMT Təhlükəsizlik Şurasının daimi üzvü kimi Rusiya bu münaqişənin tezliklə sülh yolu ilə nizama salınması üçün özünün bütün potensialından istifadə edəcəkdir.
Rusiya diplomatı jurnalistlərin suallarına cavab verərkən demişdir ki, “bu gün Rusiya Qarabağ probleminin həlli üçün açar ola bilərmi? Biz hesab edirik ki, ola bilməz... Bu gün biz deyirik ki, Qarabağ problemi beynəlxalq birliyin maksimum köməyi ilə, Ermənistanla Azərbaycan arasında danışıqlar prosesinə yardım göstərilməsi ilə həll edilməlidir. Qarabağ probleminə dair kənardan zorla qəbul etdirilən heç bir qərar uzunmüddətli xarakter daşımayacaqdır. Bu qərarın tam beynəlxalq təminatı olmayacaqdır. Xüsusən də münaqişənin nizama salınmasını təkcə bir dövlət, məsələn, Rusiya öz üzərinə götürdüyü halda. Bu halda münaqişənin gələcəkdə həll ediləcəyinin üstündən xətt çəkmək olar, çünki tarix yenidən təkrarlana bilər... Bu problemi Rusiya təkbaşına deyil, məhz Minsk qrupunun həmsədri olaraq öz diqqət mərkəzində saxlayır. Eyni zamanda, biz Azərbaycanın ərazi bütövlüyü prinsipini heç bir vəchlə rədd etmirik və bununla alver etmirik. Qarabağ problemi mərhələ-mərhələ həll olunmalıdır. Birinci mərhələ - işğal olunmuş Azərbaycan torpaqlarının qaytarılması və qaçqınların qayıtması, ikinci mərhələ isə Dağlıq Qarabağın statusu probleminin həlli”.
Nikolay Ryabov Bakı ilə Vaşinqtonun hərbi sahədə yaxınlaşmasına Moskvanın münasibəti barədə suala cavabinda demişdir ki, əldə edilmiş razılaşmalar Rusiyada nə narahatlıq, nə də ki, ciddi təşviş doğurmur. Həmin razılaşmaların xarakterini “əməkdaşlığın intensivləşdirilməsi” kimi qiymətləndirmək niyyətində deyiləm və NATO-nun Şərqə doğru genişlənməsinə bunun əsla dəxli yoxdur.
Rusiya diplomatı vurğulamışdır ki, “biz Azərbaycan Respublikasının ərazi bütövlüyünə və suverenliyinə, onun müstəqil xarici siyasət yeritmək hüququna dərin hörmət bəsləyirik. Bu siyasətin istiqamətlərindən biri öz silahlı qüvvələrini qurmaqda tərəfdaşlar seçməkdən ibarətdir”. Ryabovun dediyi kimi, Azərbaycan çox ağır münaqişəyə məruz qalmışdır və öz təhlükəsizliyini təmin etmək istəyir. Ona görə də Rusiya “Azərbaycanın səylərini başa düşür və buna qətiyyən mane olmaq niyyətində deyildir”.
Bölmənin digər xəbərləri
