Nizami rayonunda 13 minə yaxın sakin tibbi müayinələrdən keçib
Bakı, 17 fevral AZƏRTAC
Prezident İlham Əliyevin tapşırığı əsasında fevralın 2-dən mayın 1-dək bütün ölkə vətəndaşlarının pulsuz tibbi müayinədən keçirilməsi kampaniyası Bakının Nizami rayonunun sakinləri tərəfindən də rəğbətlə qarşılanıb.
AZƏRTAC xəbər verir ki, fevralın 2-dən 16-dək artıq 12 min 957 rayon sakininin tibbi müayinələrdən keçirilməsi təmin edilib. Müayinələr zamanı xəstəlik aşkarlanan 643 nəfər ambulator, 107 nəfər stasionar müalicəyə götürülüblər. Ümumilikdə isə rayon üzrə 18 yaşdan yuxarı 116 min nəfərin profilaktik müayinələrdən keçirilməsi nəzərdə tutulub.
Dövlət başçısının tapşırığının icrası ilə əlaqədar rayon icra hakimiyyətində operativ tədbirlər görülüb. Rayon rəhbərliyinin yanında idarə, təşkilat, səhiyyə müəssisələri rəhbərlərinin və rayon fəallarının iştirakı ilə müşavirə keçirilib. Müşavirədə səhiyyə müəssisələrinin rəhbərlərinə müəssisələrdə tibbi avadanlıqların işlək vəziyyətdə olması, tibbi heyətin hazırlığı barədə tapşırıq verilib. Rayon sakinləri tibbi müayinə aksiyası barədə məlumatlandırılıblar. Sakinlərin tibbi müayinəsinin yüksək səviyyədə və mütəşəkkil təşkili məqsədi ilə müvafiq komissiya yaradılıb, xüsusi qrafik tərtib edilib. Hazırda sakinlər rayon ərazisində yerləşən 18 və 32 nömrəli birləşmiş şəhər xəstəxanalarında və 26 nömrəli şəhər poliklinikasında müayinə olunurlar.
Rayondakı 26 nömrəli şəhər poliklinikasında sakinlər müayinələrdə mütəşəkkil qaydada iştirak edirlər. Vətəndaşlar qrafik əsasında qeydiyyata düşdükdən sonra terapevtlər tərəfindən yoxlanılır, sonra onlar laborator, elektrokardioqrafiya, ultrasəs və rentgen müayinələrindən keçirlər.
Poliklinikanın şöbə müdiri Tahirə Əliyeva bildirib ki, ötən əsrin 70-ci illərindən fəaliyyət göstərən poliklinika rayonunun 66 min sakininə xidmət edir. Bugünkü aksiya onun göstərir ki, əhalinin sağlamlığının qorunması Azərbaycan dövlətinin əsas hədəflərindəndir. İllərlə həkimə gəlməyənlər indi müayinələrə cəlb olunurlar. Müayinələrin əsas məqsədi xəstəliklərin erkən aşkarlanmasıdır. Bu isə dövlət başçısının tapşırığı əsasında aparılan tibbi müayinə aksiyasının əhəmiyyətini daha da artırır. Şöbə müdirinin dediyinə görə, poliklinikada aksiya başlayandan indiyə qədər 3 min 700 nəfər hərtərəfli tibbi müayinədən keçib. Müayinə olunan sakinlərin 216-da ürək-damar, onkoloji və endokrinoloji xəstəliklər aşkar edilib.
Müayinədən keçənlər öz sağlamlıqları barədə məlumat əldə etdiklərinə görə Prezident İlham Əliyevin bu humanist addımından razılıqlarını bildiriblər.
Rayondakı 61 nömrəli məktəbin direktoru Zemfira Şıxəliyeva vurğulayıb ki, Prezident İlham Əliyevin tapşırığı ilə başlanan bu kampaniya genefondumuzun qorunmasına, eləcə də ölkə vətəndaşlarının sağlamlıqlarının qorunmasına xidmət edir.
Poliklinikanın həkim heyətindən razılığını bildirən rayon sakini Yeganə Abdullayeva deyib: ”Mən də bütün müayinələrdən keçdim. Müşahidə etdiyiniz kimi, insanlar öz sağlamlıqları barədə məlumat əldə etmək üçün axın-axın gəlirlər və həkimlərin müayinəsindən keçirlər. Biz buna görə dövlətimizin başçısına minnətdar olmalıyıq.”
Bölmənin digər xəbərləri
