Bakı, 3 aprel (AZƏRTAC, Nihat Budaqov). Aprelin 3-də Nizami Rayon İcra Hakimiyyətində rayon əhalisinin tibbi müayinəsinin gedişi ilə bağlı müşavirə keçirilmişdir.

AZƏRTAC xəbər verir ki, müşavirədə çıxış edən rayon icra hakimiyyətinin başçısı Tahir Budaqov Prezident İlham Əliyevin tapşırığı ilə fevralın 17-dən mayın 1-dək ölkə əhalisinin pulsuz tibbi müayinəsinin keçirilməsi işinin Nizami rayonunda uğurla icra olunduğunu demişdir.

Qeyd olunmuşdur ki, ölkə əhalisinin sağlamlığının qorunması dövlətin sosial siyasətinin əsas prioritetlərindən biridir. Prezident İlham Əliyevin əhalinin tibbi müayinəsi ilə bağlı tapşırığı xəstəliklərin profilaktikası istiqamətində atılan uğurlu addımlardandır. Bu, xəstəliklərin erkən aşkar edilməsi baxımından çox vacibdir. Belə aksiyaların keçirilməsi ölkə rəhbərinin xalqımızın sağlamlığının qorunmasına göstərdiyi qayğının bariz nümunəsidir.

Sonra rayon icra hakimiyyəti başçısının müavini Gülnaz İsrafilova rayon üzrə əhalinin tibbi müayinədən keçirilməsinin hazırkı vəziyyətinə dair məruzə ilə çıxış etmişdir.

Bildirilmişdir ki, sakinlərin tibbi müayinəsinin yüksək səviyyədə və mütəşəkkil təşkili məqsədilə rayon icra hakimiyyətində müvafiq komissiya yaradılmış və xüsusi qrafik tərtib edilmişdir. Bu müddət ərzində rayon üzrə 18 yaşdan yuxarı 115 mindən çox sakinin kampaniyadan faydalanması nəzərdə tutulmuşdur. Rayon əhalisinin tibbi müayinədən keçirilməsi məqsədilə 18 və 32 nömrəli birləşmiş şəhər xəstəxanalarında, 26 nömrəli şəhər poliklinikasında bütün lazımi hazırlıq işləri görülmüşdür. 11 nömrəli birləşmiş şəhər xəstəxanasında yenidənqurma işləri aparıldığından həmin tibb müəssisəsi hazırda öz fəaliyyətini müvəqqəti olaraq 32 nömrəli birləşmiş şəhər xəstəxanasında davam etdirir və ərazi üzrə sakinlərin müayinəsi bu səhiyyə müəssisəsində aparılır.

Qeyd olunmuşdur ki, rayon icra hakimiyyəti başçısının Keşlə qəsəbəsi və sahə inzibati ərazi dairələri üzrə nümayəndəlikləri, mənzil- kommunal istismar sahələri və mənzil tikinti kooperativləri əhalinin ümumi tibbi müayinədən keçirilməsi işində yaxından iştirak edirlər. Fevralın 17-dən başlayaraq ərazilərdə bu qurumların rəhbərləri ilə mütəmadi görüşlər keçirilmişdir. Bunun nəticəsidir ki, hər gün qrafikə uyğun olaraq idarə, müəssisə və təşkilatlarda çalışan işçilər, eyni zamanda, ünvanlar üzrə sakinlər aidiyyəti tibb müəssisələrinə gələrək müayinədən keçirlər. Səhiyyə ocaqlarına gələ bilməyən yaşlı insanlara evlərində tibbi xidmət göstərilməsi məqsədilə səyyar briqadalar da yaradılmışdır.

G.İsrafilova bildirmişdir ki, fevralın 17-dən martın 31-dək rayonun 18 yaşdan yuxarı 40 min 151 nəfər əhalisi icbari tibbi müayinəyə cəlb olunmuş, onlardan 31 min 991 nəfəri poliklinika və xəstəxanalarda, 8 min 160 nəfəri isə evlərdə müayinədən keçmişdir. Bu müddət ərzində 3 min 648 nəfər rentgen, 7 min 508 nəfər laborator, 3 min 815 nəfər ultrasəs, 3 min 381 nəfər isə elektrokardioqram müayinəsindən keçmiş, 2 min 273 nəfər ambulator, 133 nəfər isə stasionar müalicəyə qəbul olunmuşdur. Müayinə aparılan səhiyyə müəssisələrinin, ümumilikdə, gündəlik qəbul gücü 950 nəfər təşkil etsə də, hər gün orta hesabla 1293 nəfər tibbi müayinədən keçmişdir. Bu göstərici həmin aksiyanın mütəşəkkil təşkilinin nəticəsi kimi qiymətləndirilə bilər.

Qeyd olunmuşdur ki, ötən ilin noyabr ayından etibarən uşaqların tibbi müayinəsinə başlanılmış, bu iş rayon ərazisində fəaliyyət göstərən 17 və 19 nömrəli uşaq poliklinikaları vasitəsilə həyata keçirilmişdir. Uşaqların sağlamlığının etibarlı şəkildə qorunması, xəstəliklərin erkən aşkara çıxarılması və vaxtında müalicəyə cəlb olunması məqsədi daşıyan icbari dispanserləşdirmənin başlandığı gündən poliklinikaların xidmət ərazisində yaşayan və təhsil alan 49 min 295 nəfər uşaqdan indiyədək 35 min 311 nəfəri müayinələrdən keçmişdir. Müayinələr zamanı 1920 nəfər xəstə uşaq aşkar edilərək dispanser nəzarətinə götürülmüşdür. Aşkar olunmuş xəstəliklərin aradan qaldırılması üçün sanitar-gigiyenik, əks epidemik və müalicə sağlamlaşdırıcı tədbirlər həyata keçirilərək xəstə uşaqlar ambulator və ya stasionar müalicəyə cəlb olunmuşlar. Hazırda çağırışçı gənclərin sağlamlıq vəziyyətlərinin daha dəqiq qiymətləndirilməsi məqsədilə yeniyetmə oğlanların əlavə tibbi müayinələri də həyata keçirilir.

Çıxış edən Yeni Azərbaycan Partiyası (YAP) Nizami rayon təşkilatının sədri, Milli Məclisin deputatı Sədaqət Vəliyeva və başqaları Nizami rayonunun səhiyyə işçilərinin qarşılarına qoyulmuş bu vacib və məsuliyyətli işin öhdəsindən layiqincə gələcəklərinə əminliklərini bildirmişlər.

Müşavirədə, həmçinin Nizami rayonundakı ümumtəhsil məktəblərində ulu öndər Heydər Əliyev irsinin öyrənilməsi vəziyyətinə dair məruzə də dinlənilmişdir.

Qeyd edilmişdir ki, cari ilin mart və may ayları ərzində ümumtəhsil məktəblərinin XI sinif şagirdlərinə dərsdənkənar vaxtlarda iki akademik saat ərzində müasir Azərbaycan tarixinin daha səmərəli öyrənilməsi məqsədilə Təhsil Nazirliyi tərəfindən müəyyən edilmiş “Ulu öndər Heydər Əliyev müstəqil Azərbaycanın memarı və qurucusudur” və “Ümummilli lider Heydər Əliyevin ideyaları müasir Azərbaycanın sosial-iqtisadi inkişafının təminatçısıdır” mövzuları üzrə əlavə açıq dərslərin tədris olunması nəzərdə tutulmuşdur.

Bildirilmişdir ki, mart ayında YAP Nizami rayon təşkilatının Heydər Əliyev lektoriya zalında və 220 nömrəli məktəb-liseydə keçirilmiş açıq dərslərdə rayonun 23 ümumtəhsil məktəbinin 1581 şagirdi iştirak etmişdir. Bundan əlavə, Füzuli, Zəngilan, Ağdam, Cəbrayıl, Qubadlı və Laçın rayonlarının 9 köçkün məktəbinin 94 şagirdi bu dərslərə cəlb edilmişdir. Ümumilikdə, 3 ay ərzində 2 min 146 şagirdin həmin dərslərdə iştirak etməsi nəzərdə tutulmuşdur.

Qeyd edilmişdir ki, rayonun 15 məktəbindən tədrisə cəlb edilən 21 qabaqcıl tarix müəllimi tərəfindən keçirilən birinci saatında Ulu Öndərin həyat və fəaliyyətinin müxtəlif aspektləri geniş təhlil olunmuş, müstəqil Azərbaycan dövlətinin memarı və qurucusu Heydər Əliyevin tarixi xidmətləri barədə şagirdlərə ətraflı məlumat verilmişdir. İkinci saatlarda isə sənədli filmlər nümayiş etdirilmişdir.

Məlumat verilmişdir ki, aprel ayında rayonun 33 məktəbinin 1436 nəfər XI sinif şagirdi, may ayında isə 21 məktəbin 1181 şagirdi bu dərslərdə iştirak edəcəkdir.

Milli Məclisin deputatı Rasim Musabəyov çıxış edərək bildirmişdir ki, belə bir əhəmiyyətli addımın atılması ölkəmizin müasir tarixinin şagirdlər tərəfindən hərtərəfli öyrənilməsinə maraq oyatmaqla onlarda fəal həyat mövqeyinin, vətəndaşlıq və vətənpərvərlik hisslərinin daha da gücləndirilməsinə etibarlı zəmin yaradacaqdır.

Digər çıxış edənlər də gənclərin dünya görüşünün formalaşdırılmasında və mənəvi tərbiyəsində belə dərslərin keçirilməsinin mühüm rol oynayacağına əminliklərini bildirmiş, şagirdlərin bu dərslərdə fəal iştirak etmələrinin vacibliyini vurğulamışlar.