NORVEÇ AZƏRBAYCANIN AVRATLANTİK STRUKTURLARA İNTEQRASİYASINI DƏSTƏKLƏYİR
Xarici İşlər Nazirliyinin mətbuat xidmətindən AZƏRTAC-a bildirmişlər ki, nazir Elmar Məmmədyarov aprelin 29-da Norveçin xarici işlər naziri Yonas Qar Störe ilə görüşmüşdür.
İkitərəfli əsasda siyasi, iqtisadi, enerji sahələrində əməkdaşlığın yüksələn xətlə inkişafından məmnunluğunu ifadə edən tərəflər, bu istiqamətdə də davam etməyi zəruri saymışlar.
Görüşdə Azərbaycanın müstəqilliyinin ilk illərindən Norveç neft şirkətlərinin ölkəmizə marağı xatırlanmış, o zamandan əlaqələrin bütün istiqamətlər üzrə inkişafı təqdirəlayiq hal hesab olunmuşdur.
Daha sonra Ermənistan-Azərbaycan, Dağlıq Qarabağ münaqişəsinin nizamlanması prosesinə toxunulmuş, Norveç rəsmisi ölkəsinin Azərbaycanın ərazi bütövlüyünü tam dəstəklədiyini, bu münaqişənin kütləvi insan tələfatına səbəb olmaqla yanaşı, region üçün də destruktiv nəticələr törətdiyini qeyd etmişdir.
Norveç tərəfi, həmçinin Azərbaycanın Avratlantik strukturlara inteqrasiyası prosesinə tam dəstək göstərməyə, bu istiqamətdə öz təcrübəsini bölüşməyə hazır olduğunu diqqətə çatdırmışdır.
Nazirliklər arasında mütəmadi görüşlərin, diplomatik akademiyalar arasında qurulmuş əlaqələrin və keçirilən birgə təlimlərin əhəmiyyəti də xüsusi vurğulanmışdır.
######
Bölmənin digər xəbərləri
