Nümayəndə heyətinin üzvü: “Vyetnam günləri” iki xalq arasında dostluq əlaqələrinin möhkəmlənməsinə xidmət edir
Bakı, 30 iyul, AZƏRTAC
“Vyetnam günləri” layihəsi Azərbaycan ilə Vyetnam arasında dostluq münasibətlərinin daha da inkişafına və xalqlar arasında qarşılıqlı anlaşmanın möhkəmlənməsinə töhfə verir.
AZƏRTAC xəbər verir ki, bu fikirləri Vyetnam Kommunist Partiyası Mərkəzi Komitəsinin keçmiş üzvü, Vyetnamın Səsi (VOV) radiosunun sabiq baş direktoru, dosent Nguyen The Ky Bakıda keçirilən “Vyetnam günləri” layihəsi çərçivəsində Bakı Dövlət Universitetində təşkil olunan “Vyetnam – kimliyin melodiyası” musiqili-mədəni proqramında çıxışı zamanı səsləndirib.
Nguyen The Ky bildirib ki, tədbir Azərbaycan ilə Vyetnam arasında Strateji Tərəfdaşlığın birinci ildönümünə həsr olunub. O qeyd edib ki, bu il həm də Vyetnam milli lideri Ho Şi Minin 1959-cu ildə Azərbaycana etdiyi tarixi səfərin 67-ci ildönümü tamam olur. Həmin səfər iki ölkə arasında uzunmüddətli dostluq münasibətlərinin formalaşmasında mühüm rol oynayıb.
Onun sözlərinə görə, musiqili-mədəni proqram çərçivəsində təqdim olunan ifalar Vyetnam xalqının milli-mədəni dəyərlərini, tarixini və mənəvi irsini nümayiş etdirməklə yanaşı, ölkənin qonaqpərvər və səmimi insanlarını da tərənnüm edir.
Nguyen The Ky çıxışında Azərbaycan və Vyetnam arasında mədəni əlaqələrin inkişafının əhəmiyyətini vurğulayaraq, bu cür tədbirlərin iki xalq arasında dostluq münasibətlərinin daha da möhkəmlənməsinə xidmət etdiyini bildirib.
Müxbir - Nərmin Muradzadə
Bölmənin digər xəbərləri
