OĞUZDA 2006-CI İLİN YEKUNLARI GENİŞ MÜZAKİRƏ OLUNMUŞDUR
AZƏRTAC-ın müxbiri xəbər verir ki, Oğuz rayon mədəniyyət evində rayon icra hakimiyyəti başçısı aparatının 2006-cı ilin yekunları və qarşıda duran vəzifələrlə bağlı geniş şura iclası keçirilmişdir.
Tədbir iştirakçıları əvvəlcə mədəniyyət evinin foyesində rayonda istehsal olunan müxtəlif növ məhsulların sərgisi ilə tanış olmuşlar.
Rayon icra hakimiyyətinin başçısı Kamil Rəhimovun 2006-cı ilin yekunları və qarşıda duran vəzifələr barədə hesabat məruzəsində ötən il Oğuz rayonunun sosial-iqtisadi, ictimai-siyasi və mədəni həyatında baş verən müsbət dəyişikliklər, ayrı-ayrı sahələr üzrə qazanılan uğurlar geniş təhlil edilmiş, yol verilmiş nöqsanlara toxunulmuş, qarşıda duran vəzifələrdən bəhs edilmişdir.
Məruzədə 2006-cı ildə respublikamızın istər daxili və xarici siyasətdə, istərsə də iqtisadi sahədə qazandığı uğurlarını ön plana çəkən icra başçısı xüsusi vurğulamışdır ki, ötən il Azərbaycan iqtisadiyyatının artım tempinin 35 faizə çatması, əhalinin maddi vəziyyətinin yaxşılaşdırılması, sosial məsələlərin həlli, o cümlədən işsizliyin aradan qaldırılması sahəsində əldə olunan yüksək nailiyyətlər bir daha onu göstərir ki, qarşıya qoyulan vəzifələr və qəbul edilən Dövlət Proqramları uğurla yerinə yetirilir.
İcra başçısı daha sonra 2006-cı ildə Oğuz rayonunda həyata keçirilən genişmiqyaslı tikinti, abadlıq və quruculuq işlərindən danışmış, sənaye, kənd təsərrüfatı, eləcə də xidmət sahələrində qazanılan uğurları diqqətə çatdırmışdır. Məruzəçi qeyd etmişdir ki, 2006-cı ildə rayon üzrə ümumi məhsul istehsalı 26 milyon 376 min manat olmuşdur ki, bunun da 87,3 faizi özəl bölmənin payına düşür. Hesabat dövründə müxtəlif mənbələr hesabına rayonda aparılan tikinti, təmir və abadlıq işlərinin ümumi dəyəri 2 milyon 47 min manat təşkil etmişdir. Regionların sosial-iqtisadi inkişafı Dövlət Proqramından irəli gələn vəzifələrin uğurlu icrası nəticəsində 2006-cı ildə rayonda 1973 yeni iş yeri yaradılmışdır ki, bunun da 657-si daimi, qalanları isə mövsümi və müvəqqəti olmuşdur. Ümumiyyətlə, müvafiq Dövlət Proqramının qəbul edilməsindən ötən dövrdə rayonda 1431-i daimi olmaqla, 5177 yeni iş yeri yaradılmışdır.
Məruzəçi daha sonra bildirmişdir ki, 2006-cı ildə müvafiq Dövlət Proqramına uyğun olaraq, rayon mərkəzində yeni xəstəxana binasının, müasir standartlara uyğun inşa edilən, dəyəri 5,5 milyon manat olan yeni İdman Kompleksinin, Azərbaycan Prezidentinin müvafiq Sərəncamı ilə təsdiqlənmiş “Qəbələ, Oğuz, Şamaxı və İsmayıllı rayonlarının sosial-iqtisadi inkişafının sürətləndirilməsinə dair əlavə tədbirlər planı”na uyğun olaraq, Filfili kəndini rayon mərkəzi ilə birləşdirən, smeta dəyəri 3 milyon manat olan 330 metr uzunluğunda yeni körpünün, habelə rayon mərkəzində 6 mərtəbəli mehmanxananın, Qarabağ müharibəsi əlilləri və şəhid ailələri üçün 8 mənzilli yaşayış binasının, Bucaq kəndində 260 yerlik yeni məktəb binasının tikintisinə başlanılmış, meyvə-tərəvəz, fındıq, tikinti materialları və cücə istehsalı sexləri işə salınmış, xeyli sayda yeni ticarət və xidmət obyektləri, həmçinin 45 fərdi yaşayış evi tikilib istifadəyə verilmişdir. Əhalinin içməli su ilə təminatını daha da yaxşılaşdırmaq üçün Sazur və Almalıq su mənbələrindən rayon mərkəzinə 4,5 kilometr uzunluğunda yeni kəmər çəkilmişdir. Bundan əlavə, fermerləri texnika və gübrə ilə təmin etmək üçün ötən il rayonda “Aqrolizinq” ASC-nin yerli aqroservis mərkəzi fəaliyyətə başlamışdır.
İclasda ayrı-ayrı təşkilatların rəhbərlərinin hesabatları dinlənilmiş, buraxılmış nöqsanların aradan qaldırılması və problemlərin həlli ilə bağlı müvafiq tapşırıqlar verilmişdir.
Şura iclasında Prezidentin İcra Aparatının məsul işçisi Məhərrəm Quliyev, Standartlaşdırma, Metrologiya və Patent üzrə Dövlət Agentliyinin baş direktoru Ramiz Həsənov, Milli Məclisin deputatı Eyvaz Qurbanov iştirak etmişlər.
Tədbirdə Azərbaycan Prezidenti İlham Əliyevə müraciət qəbul edilmişdir.
Bölmənin digər xəbərləri
