OĞUZDA ULU ÖNDƏR HEYDƏR ƏLİYEVİN XATİRƏSİNƏ HƏSR OLUNMUŞ SİLSİLƏ TƏDBİRLƏR KEÇİRİLMİŞDİR
Oğuz, 11 may (AZƏRTAC). Azərbaycan xalqının ümummilli lideri Heydər Əliyevin anadan olmasının 87-ci ildönümü Oğuz rayonunda da silsilə tədbirlərlə geniş qeyd olunmuşdur.
Ulu öndərin doğum günü münasibətilə rayonun idarə, müəssisə və təşkilatlarında elmi-praktiki konfranslar, dəyirmi masalar, xatirə gecələri keçirilmiş, orta məktəblərdə ümummilli liderin həyat və fəaliyyətini, irsini öyrənən ilk dərslər təşkil edilmiş, sərgi və guşələr yaradılmışdır. Ulu öndərin doğum günü şərəfinə rayonda güləş, şahmat, futbol, voleybol və digər idman növləri üzrə xatirə turnirləri keçirilmiş, habelə 6,5 kilometr məsafəyə marafon qaçışı təşkil edilmişdir. Bundan əlavə, uşaq və yeniyetmələr arasında “Biz sülh istəyirik” mövzusunda asfalt üzərində rəsm müsabiqəsi keçirilmişdir.
Ümummilli liderin xatirə günləri çərçivəsində rayon Mədəniyyət evində “Heydər Əliyev və Azərbaycan” mövzusunda elmi-praktiki konfrans keçirilmişdir. Tədbir iştirakçıları əvvəlcə foyedə ulu öndərə həsr olunmuş sərgi və guşələrə, o cümlədən gül sərgisinə baxmışlar.
Konfransda çıxış edən natiqlər bütün ömrünü xalqımızın tərəqqisi və firavanlığına, dövlətçiliyimizin möhkəmlənməsinə həsr etmiş Heydər Əliyevin yorulmaz fəaliyyətinin ən önəmli məqamlarına toxunmuş, ulu öndərin Vətən və xalq qarşısındakı əvəzsiz tarixi xidmətlərindən bəhs etmişlər.
Konfransın sonunda ümummilli liderin doğum günü münasibətilə rayonda keçirilmiş inşa yazı və rəsm müsabiqələrinin, idman yarışlarının qaliblərinə mükafatlar, habelə YAP sıralarına daxil olan gənclərə üzvlük vəsiqələri təqdim edilmişdir.
Ulu öndərin xatirəsini daim əziz tutan, müqəddəs amallarını qəlblərdə yaşadan oğuzlular mayın 10-da dahi rəhbərin adını daşıyan parka gələrək, ümummilli liderin abidəsi önünə gül-çiçək dəstələri düzmüş, xatirəsini ehtiramla yad etmişlər.
Sonra rayon rəhbərliyi və ictimaiyyətin nümayəndələri Heydər Əliyev muzeyinə baş çəkmiş, ulu öndərin həyat və fəaliyyətinə həsr olunmuş ekspozisiyaya baxmışlar.
Bölmənin digər xəbərləri
