ÖLKƏDƏ TAXIL YIĞIMI BAŞA ÇATMAQ ÜZRƏDİR
AZƏRTAC xəbər verir ki, ölkədə taxıl yığımı başa çatmaq üzrədir.
Respublika üzrə 863 min hektar taxıl əkilən sahədən 827 min hektarı, başqa sözlə, 96 faizi biçilmiş, 31 rayonda isə biçin tam başa çatdırılmışdır.
Məhsulun itkisiz və vaxtında yığılması üçün Kənd Təsərrüfatı Nazirliyi, “Aqrolizinq” xidməti yerlərdə qərargahlar təşkil etmiş, yığıma ölkə üzrə 2800-dən çox kombayn cəlb olunmuşdur. Aran rayonlarında biçini başa vuran kombaynlar dağ rayonlarına göndərilir.
İndiyə qədər keçən ildəkindən 481 min ton çox - 2 milyon 249 min ton taxıl yığılmışdır. Bu, 2000-ci ildən sonra rekord həddə taxıl əldə olunması deməkdir.
Kənd Təsərrüfatı Nazirliyindən bildirmişlər ki, yığıma mane olan amillər də vardır. Sərhədyanı bölgələrin çoxunda Ermənistan silahlı qüvvələrinin atəşkəs rejimini tez-tez pozması taxıl yığımına da mene olur. Bir tərəfdən də ermənilərin törətdiyi yanğınlar məhsulun vaxtında yığılmasına çətinliklər yaradır. Amma bununla belə insanlar becərdikləri taxılı vaxtında və itkisiz yığmağa çalışırlar.
Builki taxıldan 150-160 min tonu gələn ilə toxumluq üçün saxlanacaqdır. Yeri gəlmişkən, indi ölkədə 300-dən çox özəl toxumçuluq təsərrüfatı vardır. Hazırda taxılın bir tonu fermerlərdən 350-400 manata alınaraq anbarlara yığılır.
Bölmənin digər xəbərləri
