Omanda ICESCO-ya üzv ölkələrin təhsil nazirlərinin konfransı təşkil olunub
Bakı, 5 oktyabr, AZƏRTAC
Omanın paytaxtı Muskat şəhərində “Təhsildə Transformasiya Sammitinin qərarları: öhdəliklərdən fəaliyyətlərə” mövzusunda ICESCO-ya üzv ölkələrin təhsil nazirlərinin 3-cü konfransı keçirilib.
AZƏRTAC təşkilatın saytına istinadla xəbər verir ki, İslam Dünyası Təhsil, Elm və Mədəniyyət Təşkilatı (ICESCO) tərəfindən Omanın Təhsil Nazirliyi, bu ölkənin Təhsil, Mədəniyyət və Elm üzrə Milli Komissiyası ilə koordinasiya əsasında təşkil edilən konfransda İslam ölkələrinin təhsil nazirləri, 27 regional və beynəlxalq təşkilatın yüksəksəviyyəli nümayəndə heyətləri, eləcə də təhsil məsələləri ilə məşğul olan vətəndaş cəmiyyəti institutları iştirak ediblər.
Konfransın keçirilməsində məqsəd ICESCO-ya üzv ölkələrdə təhsilin transformasiyası üzrə öhdəlikləri gücləndirmək, qabaqcıl təcrübələrin yayılması və onların tətbiqini sürətləndirmək üçün effektiv mexanizmlər yaratmaq olub. Bundan əlavə, ICESCO üzv dövlətlər arasında əməkdaşlığı inkişaf etdirməyə, maliyyələşdirmə və donor qurumlarını birləşdirən şəbəkə qurmağa, Təhsildə Transformasiya Sammitinin nəticələrinə nəzarət etmək üçün mexanizmləri inkişaf etdirməyə və nazirliklərin bu sahədə səylərini dəstəkləyən proqramlar yaratmağa çalışır. Konfrans, həmçinin İslam dünyasının sivilizasiya irsində təhsil transformasiyasını dəstəkləyən etik dəyərlərə əsaslanan prinsipləri vurğulayıb.
Konfrans çərçivəsində təhsil sahəsində aparıcı qlobal təşkilat və şirkətlərin, o cümlədən “NewGlobe”, “Avantis”, “Classera”, “Alef Education” və Təhsil Test Xidmətinin (ETS) iştirakı ilə sərgi təşkil olunub. Bu sərgi Beynəlxalq Bakalavr Təşkilatı və Kembric Universiteti ilə akademik tərəfdaşlığı da əhatə edib.
Tədbir “İslam dünyasında təhsilin transformasiyasına dair” Muskat Bəyannaməsinin qəbulu ilə başa çatıb. Bəyannamədə ICESCO-nun İslam dünyası üzrə Süni İntellekt Etikası Xartiyasının qüvvəyə minməsi alqışlanıb, həmçinin Beynəlxalq Tələbələrin Qiymətləndirilməsi Proqramının (PISA) üzv dövlətlərin spesifikliyinə və prioritetlərinə uyğunlaşdırılmasına dair ICESCO-nun təşəbbüsü qəbul edilib, gender bərabərliyi indikatorunun strateji əhəmiyyəti vurğulanıb, təhsilin transformasiyası məqsədləri ilə İslam dünyasının dəyərləri arasında uyğunluq təsbit edilib. Bununla yanaşı, sənəddə ICESCO-nun 2021-ci ilin yanvarından 2024-cü ilin iyuluna qədər təhsil sahəsində fəaliyyəti, qızların təhsilinin hazırkı vəziyyəti, media savadlılığı, Londonda keçirilən nazirlər görüşünün nəticələri, erkən uşaqlıq dövründə təhsil və qayğının inkişafı məsələləri də öz əksini tapıb.
Bölmənin digər xəbərləri
