OMBUDSMAN APARATININ ƏMƏKDAŞLARI HƏRBİ HİSSƏLƏRDƏ NÖVBƏTİ GÖRÜŞLƏR KEÇİRMİŞLƏR
Azərbaycan Respublikasının İnsan Hüquqları üzrə Müvəkkili Aparatının əməkdaşları Silahlı Qüvvələrimizin 90 illiyi ərəfəsində Bakıdakı “N” saylı hərbi hissələrdə görüşlər keçirmişlər.
Ombudsman Aparatından AZƏRTAC-a bildirmişlər ki, nümayəndələr hərbi hissələrin şəxsi heyəti qarşısında çıxış edərək, bu il iyunun 26-da Azərbaycan Silahlı Qüvvələrinin yaradılmasının 90 illiyinin təntənəli qeyd ediləcəyini bildirmişlər.
Ümummilli lider Heydər Əliyevin ordu quruculuğunda apardığı köklü islahatlar nəticəsində müstəqil respublikamızın Silahlı Qüvvələrinin təkmilləşərək bu gün müasir standartlara cavab verən orduya çevrildiyi qeyd edilmişdir.
Aparatın əməkdaşları əsgər və zabitlərə Vətənin müdafiəsinə daim hazır olmağı, hərbi biliklərə mükəmməl yiyələnməyi tövsiyə etmişlər.
Görüşlərdə, həmçinin, Ombudsman təsisatında hərbi qulluqçuların hüquqlarının müdafiəsi üzrə sektorun fəaliyyəti, onların hüquqlarının təmin olunması istiqamətində görülmüş işlər barədə məlumat verilmişdir.
Müvəkkilin nümayəndələri hərbi hissələrdə şəxsi heyətin yaşayış yerlərinə baxış keçirmişlər.
Bölmənin digər xəbərləri
