Ombudsman: Güclü audit sistemi korrupsiya risklərinin azaldılmasına mühüm töhfə verir
Bakı, 25 iyun, AZƏRTAC
Azərbaycan Respublikasında insan hüquq və azadlıqlarının qorunması dövlət siyasətinin əsas prioritetlərindən biridir.
AZƏRTAC xəbər verir ki, bunu Azərbaycan Respublikasının insan hüquqları üzrə müvəkkili (Ombudsman) Səbinə Əliyeva "Azərbaycanda İnsan Hüquqları Günü”nə həsr olunmuş “Dövlətin və təsərrüfat subyektlərinin mənafelərinin müdafiəsində auditin rolu” mövzusunda keçirilən beynəlxalq konfransda çıxışı zamanı deyib.
Ombudsman qeyd edib ki, bu sahədə möhkəm hüquqi və institusional təməl Ümummilli Lider Heydər Əliyevin müəyyən etdiyi dövlətçilik kursu əsasında formalaşdırılıb.
“Məhz Ulu Öndərin 18 iyun 1998-ci il tarixli Sərəncamı ilə təsdiq edilmiş “İnsan hüquqlarının müdafiəsinə dair Dövlət Proqramı” ölkəmizdə insan hüquqlarının müdafiəsi sahəsində yeni mərhələnin əsasını qoyub. Bu siyasət bu gün Azərbaycan Respublikasının Prezidenti İlham Əliyev tərəfindən uğurla davam etdirilir. Prezidentin 18 iyun 2007-ci il tarixli Sərəncamı ilə hər il iyunun 18-nin İnsan Hüquqları Günü kimi təsis olunması dövlətimizin insan hüquqlarına verdiyi yüksək dəyərin və bu sahədə həyata keçirilən ardıcıl siyasətin bariz ifadəsidir. Bu ənənəyə uyğun olaraq cari ildə də 18 may –18 iyun tarixləri İnsan Hüquqları Aylığı elan olunub, respublikanın müxtəlif bölgələrində dövlət qurumlarının, vətəndaş cəmiyyəti institutlarının, elm və təhsil müəssisələrinin iştirakı ilə geniş maarifləndirmə tədbirləri keçirilib. Bu təşəbbüs cəmiyyətdə insan hüquqları mədəniyyətinin möhkəmləndirilməsinə, hüquqi maarifləndirmənin genişləndirilməsinə və ictimai iştirakçılığın artırılmasına mühüm töhfə verib. İnsan Hüquqları Aylığının məntiqi davamı olaraq təşəbbüsümüzlə “Süni intellekt dövründə insan hüquqları: imkanlar, risklər və məsuliyyətlər” mövzusunda Ombudsmanların Beynəlxalq Bakı Sammiti keçirilib. 30-dək ölkədən ombudsmanların, milli insan hüquqları institutlarının, beynəlxalq təşkilatların və ekspertlərin iştirak etdiyi sammit insan hüquqlarının yeni texnoloji çağırışlar fonunda qorunmasına dair səmərəli beynəlxalq dialoq platformasına çevrilib, yekunda Bakı Bəyannaməsi qəbul edilib”, - deyə ombudsman qeyd edib.
Səbinə Əliyeva bildirib ki, bugünkü konfransın mövzusu insan hüquqları ilə iqtisadi idarəetmə arasında mövcud olan qarşılıqlı əlaqəni bir daha ön plana çıxarır: “Müasir dövrdə insan hüquqlarının səmərəli təminatı yalnız hüquqi mexanizmlərlə məhdudlaşmır. Şəffaf və hesabatlı idarəetmə, dövlət vəsaitlərindən səmərəli istifadə, korrupsiyaya qarşı effektiv mübarizə, sağlam sahibkarlıq mühitinin formalaşdırılması və ictimai etimadın möhkəmləndirilməsi insan hüquqlarının etibarlı müdafiəsinin əsas şərtlərindəndir. Məhz buna görə audit institutu xüsusi əhəmiyyət daşıyır. Audit yalnız maliyyə hesabatlarının düzgünlüyünün qiymətləndirilməsi deyil, eyni zamanda, şəffaflığın, hesabatlılığın, qanunun aliliyinin və məsuliyyətli idarəetmə mədəniyyətinin təmin edilməsinə xidmət edən mühüm institusional mexanizmdir. Güclü audit sistemi dövlətin, təsərrüfat subyektlərinin və vətəndaşların qanuni mənafelərinin qorunmasına, ictimai resurslardan səmərəli istifadəyə, korrupsiya risklərinin azaldılmasına və iqtisadi təhlükəsizliyin möhkəmləndirilməsinə mühüm töhfə verir.
İnsan hüquqları baxımından audit şəffaflığı və hesabatlılığı gücləndirir, ictimai etimadı artırır, hüquq pozuntularının qarşısının alınmasına və sosial ədalətin təmin olunmasına xidmət edir. Fəaliyyətimizdə insan hüquqlarının pozulmasına reaksiya verməklə yanaşı, bu cür halların qarşısının alınmasına xidmət edən preventiv mexanizmlərin inkişafına da xüsusi önəm veririk. Bu baxımdan audit institutu hüquqi dövlətin möhkəmləndirilməsi, səmərəli idarəetmənin təşviqi və insan hüquqlarının etibarlı müdafiəsi baxımından mühüm tərəfdaşdır. Əminəm ki, bugünkü konfrans çərçivəsində aparılacaq müzakirələr audit institutunun inkişafına, dövlət idarəçiliyində şəffaflıq və hesabatlılığın daha da möhkəmləndirilməsinə, dövlətin və təsərrüfat subyektlərinin qanuni mənafelərinin qorunmasına, eləcə də insan hüquqlarının daha səmərəli təmin olunmasına mühüm töhfə verəcəkdir. Dövlət qurumları, peşə birlikləri, vətəndaş cəmiyyəti institutları və beynəlxalq tərəfdaşlarla əməkdaşlığın genişləndirilməsini fəaliyyətimizin mühüm istiqamətlərindən biri hesab edir və bu əməkdaşlığın gələcəkdə də uğurla davam edəcəyinə inanırıq”.
Fotoqraf - Azər İbrahimov
Bölmənin digər xəbərləri
