OMBUDSMAN YARDIMLIDA İCTİMAİ DİNLƏMƏLƏR KEÇİRMİŞDİR
Ombudsman Aparatından AZƏRTAC-a bildirmişlər ki, Azərbaycan Respublikasının insan hüquqları üzrə müvəkkil Elmira Süleymanova insan hüquqlarının müdafiəsi üzrə Milli Fəaliyyət Planının (MFP) həyata keçirilməsi vəziyyətinin monitorinqi məqsədilə Yardımlı rayonunda ictimai dinləmələr keçirmişdir.
Tədbirdə Milli Məclisin bu bölgədən seçilmiş deputatı Sabir Rüstəmxanlı, rayon icra hakimiyyəti və bələdiyyələrinin, məhkəmə, daxili işlər şöbəsi və prokurorluğun, dairə seçki komissiyalarının, ictimai qurumların, yerli qeyri-hökumət təşkilatları və icmaların nümayəndələri iştirak etmişlər.
E.Süleymanova insan hüquq və azadlıqlarının müdafiəsinin dövlətin qarşısında duran ən mühüm vəzifələrdən biri olduğunu diqqətə çatdırmışdır. O, MFP-nin təsdiq edilməsindən ötən müddətdə ölkəmizin bütün rayonlarında sənədin tətbiqi ilə bağlı görülən işlər barədə məlumat vermişdir.
Milli Məclisin deputatı S.Rüstəmxanlı MFP-də insan hüquq və azadlıqlarının təmini istiqamətində mühüm müddəaların təsbit olunduğunu, müvəkkilin rəhbərliyi ilə bu planın uğurla həyata keçirildiyini bildirmişdir.
Müzakirələrdə çıxış edənlər MFP-də məhkəmə, prokurorluq və polis orqanları qarşısında qoyulmuş vəzifələrin icrası istiqamətində görülmüş işlər, rayonun müvafiq dövlət orqanlarında insan hüquq və azadlıqlarının, o cümlədən seçki hüquqlarının təmin olunması, vətəndaşlara şəxsiyyət vəsiqəsinin verilməsi vəziyyəti barədə məlumat vermişlər.
Səfər çərçivəsində Yardımlı Rayon Polis Şöbəsinin müvəqqəti saxlama təcridxanasına baxış keçirilmişdir.
