DÜNYA
ÖTƏN İL ABŞ YOLLARINDA 43 MİNƏ YAXIN ADAM HƏLAK OLMUŞDUR
AZƏRTAC-ın Vaşinqtondakı müxbiri ABŞ Nəqliyyat Nazirliyinin ötən il baş vermiş avtomobil qəzalarının yekunlarına dair hesabatına istinadla xəbər verir ki, 2002-ci ildə ölkənin avtomobil yollarında 42815 adam həlak olmuşdur. Onların əksəriyyəti – təxminən 59 faizi təhlükəsizlik kəmərlərindən istifadə etməmişdir. Ölüm hallarının təxminən 41 faizi spirtli içki qəbul edilməsi ilə bağlıdır.
Bununla belə, yol-nəqliyyat hadisələrində zərərçəkənlərin ümumi sayı rekord miqdarda - 2,92 milyon nəfərə qədər azalmışdır. Mütəxəssislər bunu federal təhlükəsizlik standartlarının sərtləşdirilməsi və avtomaşınların konstruksiyasının yaxşılaşdırılması ilə izah edirlər.
ABŞ-ın nəqliyyatda təhlükəsizlik üzrə milli bürosunun bu günlərdə yaydığı məruzə Amerika hökumətinin avtomobil qəzalarına necə münasibət göstərdiyini əks etdirir. Hesabat 2001-ci ildə baş vermiş iki mikroavtobus qəzasına həsr olunmuşdur. Birinci hadisə zamanı üç nəfər, ikinci hadisə zamanı isə bir nəfər həlak olmuşdur. Hakimiyyət orqanları belə qənaətə gəlmişlər ki, hər iki qəzada sürücü təqsirkar olmuşdur, çünki avtomobili idarə edə bilməmişdir. Ona görə də ölkənin bütün ştatlarının hakimiyyət orqanlarına sərnişin daşımaları üçün 15 nəfər tutan mikroavtobuslardan istifadə olunması, belə mikroavtobusları idarə etmək hüququnun isə xüsusi hazırlıq kursu keçmiş, nəzəri və praktiki imtahanlardan uğurla çıxan sürücülərə verilməsini məsləhət görmüşlər.