ÖTƏN İL BİLƏSUVARDA 55,4 MİLYON MANATLIQ KƏND TƏSƏRRÜFATI MƏHSULU İSTEHSAL OLUNMUŞDUR
Biləsuvar, 24 fevral (AZƏRTAC). Keçən il Biləsuvarda 55,4 milyon manatlıq kənd təsərrüfatı məhsulu istehsal edilmiş, bu işlə məşğul olan hər bir ailə 4386 manat gəlir götürmüşdür.
“Kənd təsərrüfatı məhsulları istehsalçılarının toxum, gübrə və damazlıq heyvanları ilə təmin edilməsinə əlavə dəstək verilməsi barədə” Azərbaycan Respublikası Prezidentinin Sərəncamının icrası ilə əlaqədar əkin sahələrinin becərilməsində istifadə edilmiş yanacaq və motor yağlarına görə mülkiyyətçilərə 1 milyon 825 min manat kompensasiya verilmişdir. Onlara, həmçinin mineral gübrələr 70 faiz güzəştlə satılmışdır.
Bakı şəhəri əhalisini ucuz və keyfiyyətli kənd təsərrüfatı məhsulları ilə təmin etmək məqsədi ilə təşkil olunan yarmarkalarda rayonun fermerləri də yaxından iştirak etmişlər. Ötən il onlar yarmarkalarda 3 min tondan çox müxtəlif növ kənd təsərrüfatı məhsulları satmışlar. Ümumiyyətlə, son 4 ildə Biləsuvar fermerləri yarmarkalarda satışa 10380 ton kənd təsərrüfatı məhsulu çıxarmışlar.
Bölmənin digər xəbərləri
