İQTİSADİYYAT
Ötən il daşınar əmlak əsaslı yüklülük müqavilələrinin sayı 2 dəfə artıb
Bakı, 12 fevral, AZƏRTAC
Dünya Bankının “Əlverişli Biznes Mühiti” layihəsinin “Maliyyə xidmətləri” indikatoru üzrə qiymətləndirilməsində iştirak edən Daşınar Əmlakın Yüklülüyünün Dövlət Reyestri üzrə məlumatlılığın artırılması istiqamətində kommersiya banklarının nümayəndələrinə maarifləndirmə tədbiri keçirilib.
Mərkəzi Bankdan AZƏRTAC-a bildirilib ki, tədbirdə daşınar aktiv əsaslı maliyyələşmə eksosisteminin ölkəmizdə stimullaşdırılması, sahibkarlıq subyektlərinin maliyyə resurslarına çıxış imkanlarının artırılması istiqamətində yaradılmış reyestrin (https://mpcr.e-cbar.az) fəaliyyəti və üstünlükləri, hüquqi zəminin daşınar aktiv əsaslı maliyyələşmə üzrə yaratdığı imkanlar, mövcud və gələcək daşınar əmlakların yüklü edilə bilməsi barədə ölkə ərazisində fəaliyyət göstərən bankların nümayəndələrinə təqdimatlar edilib və mahiyyəti üzrə müzakirələr aparılıb.
Qeyd edək ki, Mərkəzi Bank daşınar əmlakı girov qoyaraq kredit almaq imkanlarının stimullaşdırılması istiqamətində davamlı tədbirlər həyata keçirir və beynəlxalq təşkilatlarla sıx əməkdaşlıq edir. Belə ki, 2023-cü il ərzində daşınar əmlak əsaslı yüklülük müqavilələrinin sayı 2 dəfə artmış və yüklülük müqavilələrinin sayı 200 mini keçib. Ən çox istifadə edilən kateqoriyalar bank hesabları, zinət əşyaları, dövriyyədə olan mallar, mebellər, heyvanlar və avadanlıqlar olub.
Ölkədə əhalinin və biznes subyektlərinin maliyyə resurslarına çıxışının asanlaşdırılması və yeni maliyyə alətlərindən geniş istifadənin təmin edilməsi məqsədilə Mərkəzi Bank tərəfindən bu mövzuda görüşlərin davamlı olaraq keçirilməsi planlaşdırılır.