Ötən il nəqliyyat sektorunda 238 milyon tondan çox yük daşınıb
Bakı, 17 yanvar, AZƏRTAC
Nəqliyyat 2024-cü ildə yük və sərnişin daşımaları əvvəlki illə müqayisədə müvafiq olaraq 3,9 faiz və 8,5 faiz artıb. Nəqliyyat sektorunda fəaliyyət göstərən təsərrüfat subyektləri tərəfindən 238,8 milyon ton yük daşınıb.
Dövlət Statistika Komitəsindən AZƏRTAC-a bildirilib ki, yüklərin 3,6 faizi dəniz, 7,8 faizi dəmir yolu, 0,2 faizi hava, 60 faizi avtomobil nəqliyyatı, 28,4 faizi isə boru kəməri ilə daşınıb.
Qeyri-dövlət sektoruna məxsus nəqliyyat vasitələri ilə daşınmış yüklərin həcmi 5,2 faiz artıb. Qeyd edək ki, daşınmış yüklərin ümumi həcmində bu sektorun xüsusi çəkisi 79,3 faiz təşkil edib. 2024-cü ildə nəqliyyatçılar 2,088 milyon sərnişinə xidmət göstəriblər. Sərnişinlərin 88,4 faizi avtomobil nəqliyyatı, 11 faizi metro, qalan hissəsi isə digər nəqliyyat növləri ilə daşınıb.
Dəmir yolu nəqliyyatı ilə 2024-cü ildə 18,5 milyon ton yük, 8531,2 min sərnişin daşınıb, 2023-cü illə müqayisədə yük daşınmasında 1,4 faiz, sərnişin daşınmasında isə 18,7 faiz artım müşahidə olunub. Orta hesabla sutkada 369 vaqon yüklənib, 441 vaqon isə boşaldılıb. Sutka ərzində dəmir yolunun Şimal istiqaməti üzrə 17,2 min ton, Qərb istiqaməti üzrə 4,2 min ton, Cənub istiqaməti üzrə isə 0,7 min ton yüklənmə işi yerinə yetirilib. Dəniz nəqliyyatı ilə 2024-cü ildə daşınmış yüklərin həcmi 8621,4 min ton təşkil etmiş və əvvəlki ilə nisbətən 4,3 faiz azalıb. Yüklərin 48,9 faizini neft yükləri təşkil edib. Dəniz limanları tərəfindən 14051,7 min ton həcmində yükləmə-boşaltma işləri həyata keçirilmiş və yüklərin 11315,8 min tonunu və ya 80,5 faizini tranzit yüklər təşkil edib. 2025-ci il yanvar ayının 1-i vəziyyətinə limanlarda qalan yüklərin həcmi 653 min ton olub. Dövr ərzində bu nəqliyyat növü ilə daşınmış sərnişinlərin sayı 2023-cü ilə nisbətən 19,8 faiz artaraq 28,4 min nəfər olub.
Nəqliyyat sektorunda daşımaların həcmində xüsusi çəkisi ən böyük olan avtomobil nəqliyyatı ilə 143,5 milyon ton yük, 1,846 milyon sərnişin daşınmış və əvvəlki illə müqayisədə müvafiq olaraq 6,9 faiz və 9 faiz artım qeydə alınıb. Sərnişinlərin 95,1 faizi avtobus, 4,9 faizi isə minik taksilərinin xidmətlərindən istifadə edib. Yük dövriyyəsi 8 faiz, sərnişin dövriyyəsi isə 10,8 faiz artıb. Metro nəqliyyatının xidmətlərindən istifadə etmiş sərnişinlərin sayı 4,6 faiz artaraq 229,5 milyon nəfər olub. Hava nəqliyyatı ilə 4014,7 min və ya 37,9 faiz çox sərnişin daşınıb.
Daşımaların 99,9 faizi dövlət, 0,1 faizi isə özəl müəssisələrə məxsus nəqliyyat vasitələri ilə həyata keçirilib. Bu nəqliyyat növü ilə yükdaşıma 15 faiz artaraq 411 min ton olub.
Bölmənin digər xəbərləri
