Ötən il ödənişli ictimai iş yerlərinin sayı 90 minə çatdırılıb
Bakı, 27 yanvar, AZƏRTAC
Ödənişli ictimai işlər əhalinin məşğulluq imkanlarının artırılmasında önəmli rol oynayır. Prezident İlham Əliyevin tapşırığına əsasən 2019-cu ilin əvvəlindən ictimai işlərin təşkili ilə bağlı yeni mexanizmi nəzərdə tutan “İşsizin DOSTu” proqramına başlanılıb.
Dost İş Mərkəzi ictimaiyyətlə əlaqələr şöbəsinin müdiri Ramilə Məmmədli AZƏRTAC-a deyib: “Əmək və Əhalinin Sosial Müdafiəsi Nazirliyinin tabeliyində olan DOST İş Mərkəzi tərəfindən icra olunan proqramın icrası çərçivəsində ötən il 38 min işsiz və işaxtaran şəxsin ödənişli ictimai işlərə cəlb edilməsi nəzərdə tutulmuşdu. Yeni növ koronavirus (COVID-19) pandemiyası dövründə sosial dəstək tədbirlərindən biri kimi, bu proqramın da əhatə dairəsi genişləndirilib. Dövlət başçısının göstərişi ilə ödənişli ictimai iş yerlərinin sayı 90 minə çatdırılıb. Onlardan 38 mini davamlı, 52 mini isə 2 aylıq kvota əsasında olan iş yerləridir. Davamlı iş yerlərinin 97 faizi, 2 aylıq iş yerlərinin isə 71 faizi işçilərlə təmin edilib”.
Onun dediyinə görə, postmüharibə dövründə şəhid ailələri, müharibə ilə əlaqədar əlilliyi olanlar və müharibə iştirakçılarının sosial dəstəklə əhatə olunması işləri çərçivəsində onların məşğulluq məsələlərinin operativ həlli istiqamətində də mühüm tədbirlər görülür: “İşsizin DOSTu” proqramı bu sahədə də xüsusi əhəmiyyət kəsb edir. Həmin dövrdə DOST İş Mərkəzi tərəfindən şəhid ailələrinin üzvlərindən, müharibə ilə əlaqədar əlilliyi olan şəxslərdən, müharibə iştirakçılarından ibarət 220 nəfər haqqı ödənilən ictimai işlərlə təmin edilib. Bu sahədə işlər davam edir. Onu da qeyd edək ki, bir sıra iri dövlət müəssisələri ilə DOST İş Mərkəzi arasında imzalanmış Sazişə əsasən, 2021-ci ildə həmin dövlət şirkətlərinin 20 mindən çox iş yerinin DOST İş Mərkəzinə ötürülməsi nəzərdə tutulub.
Həmin işlərdə çalışan şəxslərlə bağlanan bütün mülkü hüquqi müqavilələr əmək müqaviləsi ilə əvəz edilir. Bu ilin yanvar ayından artıq həmin prosesə başlanılıb. DOST İş Mərkəzi tərəfindən işə qəbul olunan hər bir şəxslə əmək müqaviləsi bağlanır. Bu isə həmin şəxslərin sosial sığorta sistemində iştirak imkanlarına, sosial sığorta stajına malik olmalarına, bununla da gələcək sosial təminat hüquqlarının formalaşmasına imkan yaradır. Onlar, həmçinin əmək qanunvericiliyi ilə nəzərdə tutulan məzuniyyət hüquqlarından da yararlanacaqlar”.
Şöbə müdiri daha sonra deyib: “İşsiz və işaxtaran vətəndaşlar ictimai işlərə cəlb olunmaq üçün ilk növbədə məşğulluq mərkəzlərində işaxtaran və ya işsiz kimi qeydiyyata alınmalıdırlar. Daha sonra yerli məşğulluq mərkəzinin müvafiq göndərişi əsasında həmin şəxslərlə DOST İş Mərkəzi arasında əmək müqaviləsi bağlanılır və hər bir əmək müqaviləsi bildirişi “Əmək müqaviləsi bildirişi” üzrə elektron informasiya sistemində qeydiyyatdan keçirilərək rəsmiləşdirilir. Haqqı ödənilən ictimai işlərə vətəndaşların cəlb edilməsi prosesi mərhələli və davamlı şəkildə həyata keçirilir”.
Bölmənin digər xəbərləri
