OVÇULUQ HAQQINDA QANUN LAYİHƏSİ HAZIRLANMIŞDIR
Aqrar siyasət daimi komissiyasından AZƏRTAC-ın müxbirinə bildirmişlər ki, Azərbaycanda 340 növ quş, 100 növə yaxın vəhşi heyvan, 90 növə qədər balıq vardır. Heyvanlar aləminin mühafizəsi və qorunması üçün 14 dövlət qoruğu, 20 dövlət yasaqlığı, 12 ovçuluq təsərrüfatı, o cümlədən 2 dövlət ovçuluq təsərrüfatı, 2 vəhşi heyvan yetişdirmə məntəqəsi fəaliyyət göstərir.
Ov sahəsi respublikamızın 5,2 milyon hektar ərazisini əhatə edir. Vəhşi heyvan və quşların məskunlaşdığı bütün torpaq, meşə və su sahələri ovçuluq təsərrüfatı sahəsi kimi istifadə olunur.
Təəssüf ki, indiyədək ovçuluq təsərrüfatını nizamlayan müasir qanun olmadığı üçün bu sahədə də müəyyən problemlər yaranmışdır. Pərakəndə və özbaşına ovçuluq nəticəsində ölkəmizin flora və faunasına külli miqdarda ziyan dəymişdir. Adları “Qırmızı kitaba” düşən bəzi nadir heyvan və quş növlərinin kökü kəsilmək üzrədir. Qanun layihəsi artıq parlamentin müzakirəsinə təqdim olunmuşdur. Azərbaycan Respublikası ərazisində ovçuluğun təşkili, ovçuluq fəaliyyətinin həyata keçirilməsi və təsərrüfatların idarə olunmasının hüquqi əsasları bu qanunla müəyyən ediləcəkdir.
Bölmənin digər xəbərləri
