Oxu nailiyyətlərinin qiymətləndirilməsi üzrə beynəlxalq tədqiqat mərhələli şəkildə davam etdirilir
Bakı, 20 may, AZƏRTAC
Təhsil Nazirliyi və Təhsil İnstitutu tərəfindən PIRLS (Progress in International Reading Literacy Study) 2021 beynəlxalq qiymətləndirmə tədqiqatının əsas mərhələsinin mövcud pandemiya şəraiti ilə əlaqədar olaraq mərhələli şəkildə təşkili planlaşdırılıb.
Nazirlikdən AZƏRTAC-a bildirilib ki, ölkə üzrə 52 bölgədən 200 məktəbdə keçirilməsi nəzərdə tutulan qiymətləndirmə tədqiqatı ilk növbədə 49 bölgə üzrə 115 məktəbdə həyata keçirilib. Mayın 17-dən etibarən isə Bakı, Sumqayıt, Gəncə şəhərləri və Abşeron rayonunda yerləşən ümumi təhsil müəssisələrində tədrisin qismən əyani formada təşkil olunması səbəbindən müvafiq bölgələrdə qiymətləndirmə tədqiqatı mayın 20-dən iyunun 11-dək təşkil olunacaq. Bu mərhələdə 95 məktəb üzrə 134 sinif və təxminən 3 min 600 şagirdin iştirakı nəzərdə tutulub. İştirakçı siniflərdən 94-ü Azərbaycan, 40-ı isə rus bölməsidir.
Qeyd edək ki, PIRLS - oxu nailiyyətlərinin qiymətləndirilməsi üzrə beynəlxalq tədqiqat IV sinif şagirdlərinin oxuyub anlama bacarığını qiymətləndirmək məqsədilə Beynəlxalq Qiymətləndirmə Assosiasiyası tərəfindən hər 5 ildən bir təşkil olunur.
Bölmənin digər xəbərləri
