Özbəkistanın yeni səfiri etimadnaməsinin surətini Azərbaycanın Xarici İşlər nazirinə təqdim edib
Bakı, 5 may, AZƏRTAC
Azərbaycan Respublikasının Xarici İşlər naziri Elmar Məmmədyarov mayın 5-də Özbəkistan Respublikasının ölkəmizə yeni təyin olunan səfiri Bahrom Aşrafxanov ilə görüşüb.
Nazirliyin mətbuat xidmətindən AZƏRTAC-a bildiriblər ki, səfir Bahrom Aşrafxanov etimadnaməsinin surətini nazir Elmar Məmmədyarova təqdim edib.
Elmar Məmmədyarov Bahrom Aşrafxanovu səfir təyin olunması münasibətilə təbrik edib və qardaş Özbəkistan səfirinə diplomatik fəaliyyətində uğurlar arzulayıb.
Tərəflər Azərbaycan və Özbəkistan arasında mövcud olan dostluq və əməkdaşlıq münasibətlərinin inkişafından məmnunluq ifadə ediblər. Ticarət və nəqliyyat sahələrində əməkdaşlığın daha da inkişaf etdirilməsinin əhəmiyyəti qeyd olunub.
Mövcud pandemiya ilə mübarizə kontekstində ölkələr arasında qarşılıqlı dəstək və əməkdaşlığın zəruriliyini vurğulayan tərəflər ümumdünya sağlamlıq böhranından sonrakı dövrdə ikitərəfli əməkdaşlığın gündəliyində duran tədbirlərin həyata keçirilməsi üzrə fikir mübadiləsi aparıblar.
Tərəflər, həmçinin beynəlxalq təşkilatlar çərçivəsində əməkdaşlıq və qarşılıqlı maraq doğuran digər məsələləri müzakirə etdilər.
Bölmənin digər xəbərləri
