“Özəl sektorda anti-korrupsiya standartları” mövzusunda seminar-müşavirə keçirilib
Bakı, 17 dekabr, AZƏRTAC
Dekabrın 17-də Baş prokuror yanında Korrupsiyaya qarşı Mübarizə Baş İdarəsi ilə Auditorlar Palatasının birgə təşkilatçılığı və Maliyyə Monitorinqi Xidməti, Sahibkarlar (İşəgötürənlər) Təşkilatları Milli Konfederasiyası, vətəndaş cəmiyyəti institutları, ali təhsil ocaqları, sahibkarlıq subyektləri, o cümlədən digər qurumların 300-dən artıq nümayəndəsinin iştirakı ilə hibrid formatda "Özəl sektorda anti-korrupsiya standartları" mövzusunda seminar-müşavirə keçirilib.
AZƏRTAC xəbər verir ki, tədbirin açılışında çıxış edən Baş prokurorun müavini - Baş prokuror yanında Korrupsiyaya qarşı Mübarizə Baş İdarəsinin rəisi Nazim Rəcəbov ölkəmizdə uğurla həyata keçirilən iqtisadi siyasət nəticəsində maliyyə şəffaflığının və azad rəqabətin tam bərqərar olunduğunu, bürokratik əngəllərin aradan qaldırıldığını qeyd edərək, mövcud nailiyyətlərin əldə edilməsində vahid strateji yanaşmanın ayrılmaz tərkib hissəsi kimi effektiv korrupsiyaya qarşı mübarizə siyasətinin də önəmli payı olduğunu bildirib, eləcə də bu istiqamətdə prokurorluq orqanları tərəfindən digər qurumlarla əlaqəli şəkildə aparılan belə maarifləndirici tədbirlərin qabaqlayıcı əhəmiyyətindən danışıb.
Auditorlar Palatasının sədri Vahid Novruzov ölkəmizdə sahibkarlığın inkişafına və fəaliyyətinə hər hansı formada müdaxilənin qarşısının alınması ilə bağlı görülən tədbirlərin iqtisadi islahatların yeni mərhələsinə təkan verməsinə, habelə kölgə iqtisadiyyatı və korrupsiyaya qarşı daha kəsərli mübarizəyə zəmin yaratdığını deyib. O, auditorların özəl sektordakı rolundan, eləcə də cinayət yolu ilə əldə olunmuş pul vəsaitlərinin leqallaşdırılmasına qarşı mübarizə sahəsindəki əhəmiyyətindən bəhs edib.
Sonra Baş prokuror yanında Korrupsiyaya qarşı Mübarizə Baş İdarəsi tərəfindən hazırlanmış “Özəl sektorda anti-korrupsiya standartları” vəsaitinin təqdimatı həyata keçirilərək materialda əks etdirilmiş sahibkarlıq subyektlərində korrupsiyaya qarşı mübarizə, korrupsiya risklərinin idarə edilməsi, maraqların toqquşması hallarının qarşısının alınması, qeyd olunan sahədə audit yoxlamalarının əhəmiyyəti və hüquqi şəxslərin cinayət məsuliyyəti kimi mövzular üzrə geniş məlumat verilib.
Bundan sonra müvafiq olaraq Auditorlar Palatasının nümayəndələri Altay Cəfərov, Elnur İbrahimov, Nəcəf Talıbov, Vəli Rəhimov və Səftər Vəlizadə, habelə prokurorluq əməkdaşları Tural Vəlibəyov, Pirayə Səmədzadə-Əliyeva, Anar Əliyev, Kamil Kamilli, Vasif Musayev və Vəlixan Allahverdov korrupsiyaya qarşı mübarizədə beynəlxalq audit standartlarının rolu, risklərin qiymətləndirilməsi, auditor sübutu və onlardan istifadə kimi əlaqədar mövzular üzrə ətraflı çıxışlar edib.
Tədbir zamanı səmərəli fikir mübadiləsi aparılmaqla iştirakçıları maraqlandıran suallar cavablandırılıb.
Bölmənin digər xəbərləri
