SİYASƏT
PARLAMENT NÜMAYƏNDƏ HEYƏTİ BAKIYA QAYITMIŞDIR
Milli Məclisin sədri Murtuz Ələsgərovun başçılığı ilə Sankt-Peterburqda MDB Parlamentlərarası Assambleya Şurasının iclasında iştirak edən Azərbaycan parlament nümayəndə heyəti martın 29-da Bakıya qayıtmışdır.
Binə hava limanında Milli Məclisin sədrini parlament sədrinin müavini Ziyafət Əsgərov, Milli Məclis Aparatının rəhbəri Səfa Mirzəyev qarşıladılar.
Murtuz Ələsgərov jurnalistlərin suallarına cavab verərək, MDB PA Şurası iclasının, habelə MDB Parlamentlərarası Assambleyası və AŞPA-nın birgə keçirdikləri terrorizmlə mübarizə üzrə parlamentlərarası forumun yekunlarını yüksək qiymətləndirdi. O, Milli Məclisin deputatı, AŞPA-dakı Azərbaycan parlament nümayəndə heyətinin başçısı İlham Əliyevin iclasın işində iştirakını xüsusi vurğuladı. İlham Əliyev iclasda və bir sıra görüşlərdə iştirak edərək terrorizmlə, xüsusən onun separatizm kimi çox təhlükəli təzahürü ilə mübarizədə Azərbaycanın mövqeyini dəqiq ifadə etmişdir.