SİYASƏT
PARLAMENT NÜMAYƏNDƏ HEYƏTİNİN ÇİN XALQ RESPUBLİKASINA SƏFƏRİ DAVAM EDİR
Aprelin 16-da Azərbaycan Respublikası Milli Məclisinin Sədri Murtuz Ələsgərovun başçılıq etdiyi parlament nümayəndə heyəti Sülh naminə Asiya Parlamentlərarası Assosiasiyasının III Baş Assambleyasının açılışı münasibətilə keçirilən tədbirlərdə iştirak etmişdir.
Asiya Parlamentlərarası Assosiasiyasının bu konfransına təşkilata üzv olan 33 ölkə ilə yanaşı, 6 ölkənin nümayəndə heyəti də müşahidəçi kimi dəvət olunmuşdur.
Konfransda iştirak edən nümayəndə heyətləri rəhbərlərinin Ümumçin Xalq Nümayəndələri Məclisi Daimi Komitəsinin sədri Li Penlə, Çin Xalq Respublikası Sədrinin müavini Hu Dzintao ilə və digər rəsmi şəxslərlə günün ikinci yarısında görüşləri olmuşdur. Sonra Sülh naminə Asiya Parlamentlərarası Assosiasiyasının III Baş Assambleyasının təntənəli açılış mərasimi keçirilmişdir. Konfransı giriş sözü ilə açan cənab Li Pen Çin Xalq Respublikasının Sədri Tszyan Tszeminin tədbir iştirakçılarına ünvanlanmış təbrik məktubunu oxumuşdur. Daha sonra Çin Xalq Respublikası Sədrinin müavini Hu Dzintao məruzə etmişdir.
Həmin gün axşam Azərbaycan Respublikası Milli Məclisinin Sədri Murtuz Ələsgərov və nümayəndə heyətinin üzvləri Çində təhsil alan azərbaycanlı tələbələrlə görüşmüşlər.
Parlament nümayəndə heyətinin Çin Xalq Respublikasına səfəri davam edir.