Pasiyentlər ağxalatlı həkimlərə daha çox etibar edirlər
Bakı, 16 fevral, AZƏRTAC
Pasiyentlər sərbəst tərzdə geyinən mütəxəssislərə nisbətən ağxalatlı və rəsmi geyimli həkimlərə daha çox etibar edirlər. AZƏRTAC xarici KİV-lərə istinadla xəbər verir ki, 14 ölkədən 11 mindən çox pasiyentin iştirakı ilə keçirilən 30 tədqiqat barədə informasiyanı təhlil edən Miçiqan Universitetinin alimləri bu qənaətə gəliblər.
Alimlər 30 tədqiqatdan 21-də müəyyən ediblər ki, həqiqətən pasiyentlərdə həkim obrazı formalaşıb və həkimlər bu obraza uyğun gəlməlidirlər. Geyim həkimin mütəxəssis kimi qəbul olunmasına təsir göstərir. 18 tədqiqata görə, könüllülər həkimi xalatda və rəsmi kostyumda təsəvvür ediblər. Cərrahlarla bağlı 7 araşdırmanın 4-də həkimin hansı geyimdə olması pasiyent üçün əhəmiyyət kəsb etməyib, yaxud könüllülər cərrah paltarında olan mütəxəssislərə daha çox etibar ediblər.
Qeyd edək ki, nəticələr çox vaxt mədəni dəyərlərdən və pasiyentlərin yaşından asılı olub. Məsələn, Avropa ölkələri və ABŞ gəncləri daha çox adi geyimdə olan mütəxəssislərə üstünlük veriblər.
Bölmənin digər xəbərləri
