PAYIZ VƏ QIŞ MÖVSÜMÜNDƏ ƏHALİNİN TƏBİİ QAZLA TƏMİNATINDA CİDDİ PROBLEMLƏR GÖZLƏNİLMİR
AZƏRTAC xəbər verir ki, bu il payız və qış mövsümündə əhalinin təbii qazla təminatında ciddi problemlər gözlənilmir.
“Azəriqaz” QSC-dən bildirmişlər ki, bu il əhaliyə paylanılacaq təbii qazın həcmi xeyli artırılmışdır. Regionların sosial-iqtisadi inkişafı Dövlət Proqramına əsasən Bakı ətrafı qəsəbələrin qazla təminatı üçün 400 kilometrlik yeni xətlər çəkiləcək, uzun müddət istismar olunan kəmərlərdə isə yenidənqurma işləri aparılacaqdır. Qəsəbələrin qazla təminatı layihəsi ilin sonuna kimi başa çatdırılacaqdır.
Cəmiyyətdən onu da bildirmişlər ki, ilin əvvəlində qaz pulunun yığımı ilə əlaqədar olan problemlər də artıq aradan qalxır. Belə ki, ilin əvvəlində əhali tərəfindən istehlak edilən qazın dəyərinin 35-40 faizi ödənilmişdisə, ilin ortasında bu rəqəm 93 faizə çatmışdır.
