Paytaxt rayonlarında faşizm üzərində qələbənin 73-cü ildönümü qeyd edilib
Bakı, 10 may, AZƏRTAC
Paytaxtın ayrı-ayrı rayonlarında Faşizm üzərində Qələbə günü münasibətilə tədbirlər keçirilib. Həmin tədbirlərdən bir neçəsi barədə AZƏRTAC-a məlumat verilib.
Xəzər rayonunda Qələbə Günü münasibətilə anım mərasimi Şüvəlan qəsəbəsində salınan Böyük Vətən müharibəsi iştirakçılarının xatirəsinə salınmış parkda keçirilib.
Dövlət himni səslənəndən sonra bir dəqiqəlik sükutla İkinci Dünya müharibəsində həlak olmuş igid oğul və qızlarımızın əziz xatirəsi yad edilib, xatirə abidəsinin önünə gül-çiçək dəstələri qoyulub.
Tədbirdə çıxış edənlər bu bayram münasibətilə veteranları təbrik ediblər.
Orta məktəb şagirdləri Vətən, qələbə və torpaq mövzusunda şeirlər söyləyiblər.
Tədbir iştirakçıları 1941-1945-ci illər müharibəsində həlak olanların xatirəsinə ucaldılmış abidənin önünə əklil qoyub, tər güllər düzüblər.
X X X
Suraxanı rayonunda bu məqsədlə keçirilən tədbirin iştirakçıları əvvəlcə Qaraçuxur qəsəbəsində yerləşən “Vətən Şəhidləri Unudulmur” abidəsinin önünə gül dəstələri qoyublar.
Tədbirdə çıxış edən rayon icra hakimiyyətinin başçısı İlqar Abbasov Böyük Vətən müharibəsi illərində Suraxanı neftçilərinin gecə-gündüz əzmlə çalışaraq cəbhənin yanacaqla təmin edilməsində əsaslı pay sahibi olduqlarını söyləyib. Qeyd olunub ki, ölkə Prezidenti İlham Əliyev İkinci Dünya müharibəsi veteranlarının qayğılarına həssaslıqla yanaşır. Böyük Vətən müharibəsi iştirakçılarına, həlak olmuş və ya sonralar vəfat etmiş döyüşçülərin dul arvadlarına, arxa cəbhədə fədakar əməyinə görə orden və medallarla təltif edilənlərə birdəfəlik maddi yardım verilməsi bunun bariz nümunəsidir. Bundan əlavə Böyük Vətən müharibəsində iştirak etmiş bəzi kateqoriyadan olanlara ayrılmış Prezident təqaüdünün artırılması, müharibə iştirakçılarının xüsusi avtonəqliyyatla təmin edilməsi də veteranlara göstərilən dövlət qayğısının bir hissəsidir.
1941-1945-ci illər müharibəsinin veteranları Cənnət Hüseynov və İldırım İmanov döyüş xatirələrini bölüşüb, onlara göstərilən diqqət və qayğıya görə ölkə rəhbərliyinə öz minnətdarlıqlarını bildiriblər.
Tədbir bədii hissə ilə davam etdirilib.
X X X
Pirallahı Rayon İcra Hakimiyyətinin humanitar məsələlər şöbəsinin müdir müavini Vüsal Babayev İkinci Dünya müharibəsində faşizm üzərində qələbənin qazanılmasında xalqımızın göstərdiyi şücaət və mərdlikdən danışıb. O, sovet ordusunun tank və təyyarələrinin Bakı neftçilərinin istehsal etdiyi yanacaqla hərəkətə gətirildiyini xüsusi vurğulayıb. Qeyd olunub ki, Böyük Vətən müharibəsi veteranlarının gənc nəsil arasında hərbi-vətənpərvərlik tərbiyəsinin güclənməsində əvəzsiz rolu var.
Rayondakı rus icmasının sədri Yelena Aşurova bayram münasibətilə veteranları və tədbir iştirakçılarını təbrik edib, onlara ən xoş arzularını çatdırıb.
Tədbirdə iştirak edən Böyük Vətən müharibəsi veteranlarına hədiyyələr təqdim olunub.
Tədbir konsert proqramı ilə yekunlaşıb.
X X X
Xətai rayonunda da II Dünya müharibəsində faşizm üzərində Qələbənin 73-cü ildönümü qeyd olunub. Tədbir iki dəfə Sovet İttifaqı Qəhrəmanı, tank qoşunları general-mayoru Həzi Aslanov adına parkda və Əhmədli qəsəbəsindəki Böyük Vətən müharibəsində həlak olan qəsəbə sakinlərinin xatirəsinə ucaldılmış Naməlum əsgər abidə kompleksinin önündə baş tutub.
Tədbirdə çıxış edən rayon icra hakimiyyəti başçısının müavini Etibar Əhmədov II Dünya müharibəsində faşizm üzərində əldə olunmuş qələbənin əhəmiyyətindən, xalqımızın bu ağır sınağın çətinliklərindən mətanətlə çıxdığını bildirib. O, 1941-1945-ci illərdə Bakıda 63 yeni neft və kimya sənayesi müəssisəsinin tikilib işə salındığı, döyüşən ordunun yanacaqla təminatında həmin müəssisələrin böyük rol oynadığını bildirib.
Rayon Veteranlar Təşkilatının sədri Nəcibə Məhərrəmova veteranlara göstərilən diqqət və qayğıya görə minnətdarlığını ifadə edib.
Tədbir rayon məktəblilərinin hazırladığı ədəbi-bədii hissə ilə davam etdirilib.
X X X
Nərimanov rayonunda yerləşən “Qardaşlıq Məzarlığı” Əbədi Xatirə Kompleksində faşizm üzərində Qələbənin 73-cü ildönümü ilə əlaqədar mərasim dövlət himninin səsləndirilməsi ilə başlayıb.
Böyük Vətən müharibəsində, həmçinin Qarabağ torpaqlarının uğrunda canlarını fəda etmiş qəhrəman Vətən övladlarının əziz xatirəsi bir dəqiqəlik sükutla yad edilib.
Tədbirdə çıxış edənlər Azərbaycan xalqının faşizm üzərindəki tarixi qələbəyə böyük töhfə verdiyini bildiriblər. Zəfərin əldə olunmasındakı igidliyə görə Azərbaycanın 130-dan çox vətəndaşının Sovet İttifaqı Qəhrəmanı adına, 170 mindən çox əsgər və zabitinin müxtəlif orden və medallara layiq görüldüyü söylənib. Alman faşizmi üzərində qazanılan möhtəşəm qələbənin əldə olunmasında xalqımızın övladlarının layiqli töhfələr verdiyi qeyd edilib.
Böyük Vətən müharibəsi veteranı Hilal İbrahimov öz çıxışında edərək onlara göstərilən yüksək diqqət və qayğıya görə dövlətimizə öz minnətdarlığını bildirib.
Tədbir iştirakçıları 1941-1945-ci illər müharibəsində həlak olanların xatirəsinə ucaldılmış abidənin önünə əklil qoyub, gül dəstələri düzüblər.
Kompleksi ziyarət ediləndən sonra veteranların iştirakı ilə şəkillər çəkilib.
Tədbir retro avtomobillərin yürüşü ilə yekunlaşıb.
X X X
Yasamal rayonunda Sovet İttifaqı Qəhrəmanı Mehdi Hüseynzadənin abidəsi önündə Böyük Vətən müharibəsi qurbanlarının anım tədbiri keçirilib.
Tədbirdə Dövlət Himni səslənəndən sonra qəhrəmanın abidəsi önünə əklil və gül dəstələri düzülüb.
Rayon icra hakimiyyətinin başçısı Əziz Əzizov veteranlarla görüşdə azərbaycanlı döyüşçülərdən formalaşdırılan milli atıcı diviziyaların Qafqazdan Berlinədək keçdiyi şanlı döyüş yolundan, Moskva, Leninqrad, Kiyev, Stalinqrad, Simferopol, Odessa və digər şəhər və yaşayış məntəqələri uğrunda vətəndaşlarımızın göstərdikləri fədakarlıq nümunələrindən danışıb.
Qeyd olunub ki, 1941-1945-ci illər müharibəsi zamanı Sovet İttifaqının sərf etdiyi neftin 70 faizindən çoxu, benzinin 80, motor yağlarının isə 90 faizi Azərbaycandan təmin olunub. Xalqımızın övladları cəbhəyə 7 tondan çox donor qanı verib.
Görüşdə çıxış edən veteranlar onların problemlərinə və sosial məsələlərinin həllinə diqqət və qayğı ilə yanaşdığına görə dövlət başçısına minnətdarlıqlarını ifadə ediblər.
Bölmənin digər xəbərləri
