Bakı, 22 sentyabr, AZƏRTAC

Azərbaycanda rəqəmsallaşma prosesinin sürətlənməsi müəssisələr üçün yeni texnoloji həllərə olan tələbatı da artırır. Bu istiqamətdə fəaliyyət göstərən şirkətlərdən biri də biznes proseslərinin və təhsil idarəçiliyinin rəqəmsallaşdırılmasına yönəlmiş həllər təqdim edən “Performance System” MMC-dir. Şirkət ilkin olaraq “Coders Azerbaijan” təhsil mərkəzinin daxili ehtiyaclarından yaranan ideya əsasında formalaşıb, 2024-cü ildən isə ayrıca məhsul kimi bazara təqdim olunub. “Performance System” MMC, həmçinin Kiçik və Orta Biznesin İnkişafı Agentliyinin (KOBİA) müvafiq şəhadətnaməsini əldə edib.

Şirkətin təsisçisi Seymur Həmidov platformanın yaranma ideyası, təqdim etdiyi rəqəmsal həllər, beynəlxalq bazarlara çıxış planları və gələcək inkişaf istiqamətləri barədə AZƏRTAC-ın suallarını cavablandırıb.

- “Performance System” MMC-nin yaranma ideyası necə formalaşdı və şirkətin fəaliyyətə başlamasında əsas məqsəd nə idi?

- “Performance System”in yaranma ideyası əvvəlcə “Coders Azerbaijan” təhsil mərkəzinin daxili ehtiyaclarından formalaşdı. Biz təhsil prosesində mövcud olan real boşluqları görürdük: tələbə, təlimçi və idarəetmə arasında kommunikasiya tam sistemli qurulmurdu, vahid nəzarət və resurs platforması çatışmırdı, həmçinin tələbələrin akademik və karyera inkişafını bir yerdən izləmək mümkün deyildi. Bu ehtiyac əsasında ilkin prototip 2019-cu ildə formalaşdırıldı. Lakin məhsulun ayrıca, müstəqil və tam məqsədyönlü platforma kimi inkişafı 2024-cü ildə baş verdi və “Performance” ayrıca məhsul olaraq bazara təqdim olundu. Əsas məqsədimiz isə istifadəçi üçün əlçatan, təhsil müəssisələri üçün funksional və bütün tərəflər arasında davamlı əlaqə yaradan innovativ idarəetmə sistemi qurmaq idi. Platformanın əsas çıxış nöqtəsi də məhz real problemin görülməsi və ona texnoloji həll təqdim olunması oldu.

- Şirkətiniz biznes proseslərinin avtomatlaşdırılması və idarəetmə sistemlərinin qurulması sahəsində hansı innovativ həllər təqdim edir?

- Əslində, ilk növbədə onu qeyd etmək vacibdir ki, bizim məhsulumuz sadəcə klassik idarəetmə sistemi deyil. Bu, bir icma platformasıdır - öyrənmək, inkişaf etmək və özünü davamlı şəkildə təkmilləşdirmək istəyən insanlar üçün qurulmuş vahid rəqəmsal mühitdir. Platforma təhsil idarəetməsi ilə yanaşı, istifadəçilərə özünüinkişaf, karyera istiqamətlənməsi, tədbirlər, resurslar, tapşırıqlar, qrupdaxili kommunikasiya və aktivlik kimi bir çox imkanlar yaradır. Bu baxımdan, məhsul “lifelong learning” yanaşmasını dəstəkləyən bir ekosistemdir.

Məsələn, proqramlaşdırma öyrənən bir tələbə sistem daxilində yalnız dərs cədvəli, tapşırıq və qiymətləndirmə görmür, eyni zamanda, aktivliyinə görə bonus xal qazanır, “Top-3 tələbə” kimi motivasiyaedici mexanizmlərlə fərqlənir və qazandığı bu dəyəri real istifadə ssenarilərinə çevirə bilir. Bu da platformanı təkcə inzibati həll deyil, həm də real vaxt motivasiya və mükafatlandırma sistemi ilə çalışan canlı bir inkişaf mühiti edir. Platformada qiymətləndirmə, davamiyyət, resurslar, qrup çatları, tədbirlər, kitabxana, sorğular, imtahan, iş elanları və CV yaratma kimi modulların olması onu həm təhsil müəssisələri, həm də istifadəçilər üçün çoxşaxəli həllə çevirir.

- Müasir dövrdə rəqəmsallaşma şirkətlərin fəaliyyətində mühüm rol oynayır. Azərbaycanda müəssisələrin bu prosesə adaptasiyasını necə qiymətləndirirsiniz?

- Düşünürəm ki, Azərbaycanda rəqəmsallaşma prosesi bir çox ölkə ilə müqayisədə kifayət qədər sürətli gedir. Bunun əsas səbəblərindən biri odur ki, internet əlçatanlığı ölkənin əksər bölgələrində yüksəkdir və əhalinin savadlılıq səviyyəsi bu transformasiyanı dəstəkləyir. Bu isə müəssisələr üçün çox vacib üstünlük yaradır. Amma məncə burada əsas məsələ təkcə texnologiyanın mövcudluğu deyil, real ehtiyacın düzgün müəyyənləşdirilməsidir. Yəni şirkətlər rəqəmsal həlləri sadəcə trend olduğu üçün deyil, konkret problemi həll etmək üçün tətbiq etdikdə daha uğurlu nəticə əldə edirlər. Azərbaycanda da artıq bu yanaşmanın gücləndiyini görürük.

- “Performance System” MMC tərəfindən hazırlanan texnoloji həllər müəssisələrin performansının artırılmasına konkret olaraq hansı üstünlükləri gətirir?

- “Performance”in əsas üstünlüyü ondan ibarətdir ki, bir şəxsin inkişaf yolu üçün lazım olan əsas mərhələləri vahid platformada birləşdirir. Ənənəvi modeldə tələbə müxtəlif mənbələrdən istifadə edir: universitet təhsili, ayrıca kurs, “self-study”, sosial mühit və ayrıca iş axtarışı prosesi. Bu isə həm vaxt itkisinə səbəb olur, həm də inkişaf prosesini parçalayır. Bizim qurduğumuz platformada isə tələbə sistemə daxil olduğu andan etibarən bütün bu imkanları bir ünvanda əldə edir.

Platforma tələbənin təhsil nəticələrini, aktivliyini, bacarıq səviyyəsini və maraq dairəsini nəzərə alaraq ona uyğun resursları, tədbirləri və hətta karyera imkanlarını yönləndirə bilir. Təhsil müəssisəsi üçün isə bu, vahid idarəetmə, şəffaf qiymətləndirmə, real vaxt davamiyyət izlənməsi, artan tələbə sayının sistemli idarəsi və bütün tərəflər arasında daha güclü kommunikasiya deməkdir. Yəni bu həll həm fərdi istifadəçinin inkişafını sürətləndirir, həm də müəssisənin ümumi performansını artırır.

- Şirkətinizin fəaliyyətində startap yanaşması və innovativ layihələrin inkişafı hansı səviyyədə yer tutur?

- Startap yanaşması bizim fəaliyyətimizin mərkəzində dayanır. Çünki bu gün sürətlə böyümək, bazarın dəyişən tələblərinə uyğunlaşmaq və real problemə çevik həll vermək üçün klassik idarəetmə modelindən daha çox startap düşüncə tərzi tələb olunur. Bu yanaşma komandada işini sevən, məqsədə inanan və nəticə üçün yüksək tempdə çalışan insanların olmasını vacib edir. “Performance” da məhz belə bir yanaşma ilə formalaşıb: əvvəl real ehtiyac görüldü, sonra prototip yaradıldı, istifadəçi davranışına əsasən inkişaf etdirildi və mərhələli şəkildə bazara çıxarıldı. Biz innovasiyaya yalnız yeni ideya kimi deyil, işləyən və dəyər yaradan sistem kimi baxırıq.

- Beynəlxalq texnologiya şirkətləri ilə əməkdaşlıq və ya xarici bazarlara çıxış istiqamətində planlarınız varmı?

- Bəli, bu istiqamətdə artıq konkret addımlar atılıb. Hazırda sistemimiz Keniyadakı peşə təhsili müəssisələrində aktiv istifadə olunur və bu da məhsulun lokal bazardan kənarda da işlək və uyğunlaşa bilən həll olduğunu göstərir. Eyni zamanda növbəti hədəf bazarlardan biri Özbəkistandır və bu istiqamətdə ilkin təmaslar, hazırlıq prosesi aparılıb. Biz inanırıq ki, təhsil və insan inkişafı yönümlü rəqəmsal məhsullara regionda ciddi ehtiyac var və “Performance” bu ehtiyaca uyğun şəkildə beynəlxalq miqyasda inkişaf edə bilər.

- Gələcəkdə “Performance System” MMC-nin inkişaf strategiyasında hansı yeni texnologiyalar və layihələr prioritet təşkil edəcək?

- Hazırda sistemdə artıq müəyyən süni intellektəsaslı yanaşmalar və rəqəmsal idarəetmə həlləri düşünülür, lakin yaxın gələcəkdə bu istiqaməti daha da dərinləşdirməyi planlaşdırırıq. Prioritetlərimizdən biri hər bir istifadəçi üçün daha fərdiləşdirilmiş təhsil və inkişaf təcrübəsi yaratmaqdır. Yəni sistem istifadəçinin davranışına, maraq dairəsinə, performansına və məqsədinə uyğun olaraq ona daha dəqiq tövsiyələr, resurslar, fəaliyyətlər və imkanlar təqdim etməlidir. Digər tərəfdən, inzibati paneldə də idarəetməni asanlaşdıran, analitikanı gücləndirən və qərarverməni sürətləndirən “ağıllı həllərin” artırılması bizim əsas fokus sahələrimizdəndir. Məqsədimiz “Performance”ı təkcə bir idarəetmə sistemi kimi deyil, tam inkişaf və qərar dəstəyi platforması kimi böyütməkdir.