Politoloq: Aİ-nin son addımı Ermənistanda demoqrafik böhranı daha da dərinləşdirəcək
Bakı, 23 iyul, AZƏRTAC
Avropa İttifaqı (Aİ) Gürcüstana və Ukraynaya gətirdiyi “xoşbəxtliyi” indi də Ermənistana ixrac etmək istəyir. Ermənilər Avropa İttifaqı Şurasının viza rejiminin liberallaşdırılması ilə bağlı danışıqlara başlamağa qərar verməsini böyük sevinclə qarşılayırlar ki, bu da başadüşüləndir. Yoxsulluq içərisində yaşayan erməni xalqına ölkəni daha rahat tərk etmək üçün bundan gözəl fürsət ola bilməz. Demoqrafik böhrandan əziyyət çəkən Ermənistan vətəndaşlarının ölkədən qaçışı üçün daha da münbit şəraitin yaradılması vəziyyəti daha da ağırlaşdıracaq. Maraqlıdır, rəsmi İrəvan onları gözləyən bu təhlükənin fərqinə varırmı? Yoxsa, Nikol Paşinyanın komandası “ən yaxşı erməni xaricdə yaşayandır” prinsipini rəhbər tutur? Görünür, onlar Ermənistanda yoxsulluqdan, işsizlikdən əziyyət çəkən, hökumətdən narazı olan ermənilərin ölkəni sürətlə tərk etmələrinin tərəfdarıdırlar”.
Bu sözləri AZƏRTAC-a açıqlamasında politoloq Ramiz Alıyev söyləyib.
O bildirib ki, qeyri-müsəlmanları Avropaya cəlb etməklə immiqrantlar arasında etnik balans yaratmağa çalışan Aİ Ermənistanı gözləyən demoqrafik böhranın fərqində deyil: “Biz bu böhranı Gürcüstanda, Baltikyanı ölkələrin timsalında gördük. Gürcüstanda işsizlər, azlıqlar, daha yaxşı həyat axtarışında olanlar, kriminal ünsürlər Avropaya üz tutdular. Gürcüstan bir dövlət, ölkə olaraq Avropaya sadələşdirilmiş viza rejimindən hansı dividendlər qazandısa, Ermənistan da o qədər xeyir götürəcək. Ermənistana "cənnət" vəd edən Avropa, əslində, burada öz mövcudluğunu daha da gücləndirməklə Rusiya, İran və Türkiyəyə qarşı siyasət həyata keçirir. Avropa, həmçinin N.Paşinyanın Ermənistanda çökən nüfuzunu, reytinqini nəzərə alaraq, narazı erməniləri ələ almaqla məşğuldur. Viza rejiminin sadələşdirilməsi, Ermənistan malları üçün liberal rejimin təmin edilməsi, təhlükəsizlik sahəsində əməkdaşlığın dərinləşdirilməsi, Aİ missiyasının genişləndirilməsi və avropalı müşahidəçilərin mandatının daha 2 il müddətə uzadılması N.Paşinyanın ölkə daxilində əlinin daha da gücləndirilməsinə xidmət edir”.
Politoloq qeyd edib ki, Avropa İttifaqının Sülh Fondu Ermənistanın hərbi dayanıqlılığının artırılması üçün İrəvana 10 milyon avro yardım ayırması bölgədə sülhü təhdid edir. “May ayında yardım məsələsi müzakirə olunanda Macarıstanın Baş naziri Viktor Orban bu qərarı bloklamışdı və eyni yardımın Azərbaycana da ayrılmasını tələb etmişdi. Görünür, Avropada ermənilərin “dostlar”ı daha çoxdur. Fransanın ardınca, Avropa İttifaqının da hərbi təyinatlı dəstəyi Ermənistanı Azərbaycanla sülh müqaviləsi bağlamaq istəyindən uzaqlaşdıracaq. Bir neçə gün əvvəl isə Ermənistanın baş naziri Nikol Paşinyanın Londonda özünü sülh danışıqlarından kənara çəkməsi, ardınca Kəlbəcərin atəşə tutulması Qərbin bu ölkəyə verdiyi “dəstəyin” nəticələridir. Qərbdə Ermənistana dəstək layihələrinin hazırlayan əsas müəlliflərdən biri, “Ermənistanın dostları şəbəkəsi”nin rəhbəri Anders Foq Rasmussen erməni lobbisinin ələ aldığı əsas şəxslərdən biridir. O, NATO-nun baş katibi vəzifəsindən getdikdən sonra “Rasmussen Global” adlı beynəlxalq siyasi konsaltinq şirkətini təsis edib. Bu şirkət pul qarşılığında bütün məsələlərlə bağlı “strateji məsləhətlər” verir. Təşkilatın əsas sponsorlarından biri də Ermənistan hökumətidir. Rasmussen 2016–2019-cu illərdə Ukrayna Prezidentinin müşaviri işləyib və Prezidentə “strateji məsələhətlər” verib. İndi biz onun Ukraynada, məşhur filmdə deyildiyi kimi, “əntiqə planlar”ının nəticələrini görürük”, - deyə politoloq vurğulayıb.
R.Alıyev bildirib ki, “Ermənistanın dostları şəbəkəsi” İrəvanın az qala bütün xarici siyasətini müəyyən edən qurumdur. N.Paşinyan öz ölkəsinin taleyini bu qeyri-hökumət təşkilatına həvalə edib. Rusiyaya qarşı geosiyasi mübarizədə alətə çevrilən Ermənistan rəhbərliyinin addımları Kreml tərəfindən diqqətlə izlənilir. Başı Ukraynadakı müharibəyə qarışan Moskva hələlik Ermənistanın şıltaqlıqlarına sözlə, bəyanatla reaksiya verir. Amma bu bəyanatların praktik mərhələyə keçəcəyi gözləniləndir. Ermənistanın Qərblə münasibətləri Azərbaycan üçün o qədər də əhəmiyyətli deyil. Amma söhbət silahlanmadan, sülh prosesinin pozulmasına hesablanan addımlardan gedirsə, rəsmi Bakı etirazını açıq formada bildirir.
Bölmənin digər xəbərləri
