Özbəkistan Prezidenti İslam Kərimov ABŞ Strateji və Beynəlxalq Tədqiqatlar Mərkəzinin məsləhətçisi, ABŞ Prezidentinin milli təhlükəsizlik məsələləri üzrə keçmiş müşaviri Zbiqnev Bjezinskini qəbul etmişdir.

AZƏRTAC-ın xüsusi müxbiri xəbər verir ki, İ.Kərimov qonağı salamladıqdan sonra demişdir: Biz sizi dünya şöhrətli ictimai-siyasi xadim kimi tanıyırıq. Ümid edirəm ki, bu görüş Özbəkistan-ABŞ münasibətləri ilə bağlı bir sıra məsələləri elmi və siyasi nöqteyi-nəzərdən müzakirə etməyə imkan verəcəkdir.

Söhbət zamanı Özbəkistanla ABŞ arasında əlaqələrin gələcək inkişafı, Əfqanıstanda vəziyyət, regionda sülh və təhlükəsizliyin möhkəmləndirilməsi, beynəlxalq terrorizmlə mübarizə problemləri müzakirə olunmuşdur.

Qonaq Özbəkistanın Baş naziri Utkir Sultanov, xarici işlər naziri Sadıq Safayev, müdafiə naziri Qədir Qulamovla görüşmüş, Xanabaddakı Amerika hərbi bazasına getmişdir.