DÜNYA
POLŞADA PREZİDENT SEÇKİLƏRİ BU GÜN KEÇİRİLSƏYDİ KİM QALİB GƏLƏRDİ?
Polşanın nüfuzlu mətbu nəşrlərindən birinin - Varşavada çıxan “Reç Pospolita” qəzetinin apardığı sosioloji sorğu bu suala birmənalı cavab vermişdir: indiki dövlət başçısının xanımı İolanta Kvasnevskaya.
Sorğunun nəticələrinə görə, İ.Kvasnevskaya Polşa Prezidenti vəzifəsinə potensial namizədlər arasında şübhəsiz liderdir və sorğu iştirakçılarının 53 faizi ona səs vermişdir. Bu isə onu göstərir ki, prezident seçkiləri indi keçirilsəydi, Kvasnevskaya qələbə qazanardı. Belə ki, sonrakı iki yeri tutan “Özünümüdafiə” parlament birliyinin lideri Ancey Lepper 14 faiz, Vətəndaş Platforması Partiyasının rəhbəri Donald Tusk isə cəmi 9 faiz səs toplamışlar.
AZƏRTAC-ın xəbər verdiyi kimi, sentyabrda “Politika” həftəlik jurnalı prezident vəzifəsinə mümkün namizədlərin reytinq cədvəlini dərc etmişdi. Onda da birinci yerə xanım Kvasnevskaya çıxmışdı.
Xatırladaq ki, Polşada prezident seçkiləri 2005-ci ildə keçiriləcəkdir.