Portuqaliya koronavirus peyvəndinin tədqiqatı üçün 10 milyon avro ayıracaq
Lissabon, 5 may, AZƏRTAC
Avropa Komissiyası tərəfindən irəli sürülmüş “COVID-19-a qlobal cavab” çərçivəsində Portuqaliyanın dövlət və özəl sektorun ayıracağı maliyyə vəsaiti 10 milyon avro təşkil edəcək. Bunu Baş Nazir Antoniu Koşta bəyan edib.
AZƏRTAC xəbər verir ki, Avropa Komissiyası bu təşəbbüslə koronavirus pandemiyasına qarşı mübarizəyə 7,5 milyard avro toplamaq üçün hökumətləri, sahibkarları, fondları və Avropa İttifaqının vətəndaşlarını bir araya gətirməyə çalışır. Bu vəsaitlər COVID-19-un diaqnostikası və müalicəsi, peyvənd işlənib hazırlanmasını sürətləndirmək üçün nəzərdə tutulur.
Avropa Komissiyası bu gündən etibarən ianələri qeydiyyata almağa başladığını və “resursların fasiləsiz artırılması prosesi” üzrə kampaniyanın növbəti mərhələlərinə keçdiyini elan edir.
Fransa, İtaliya, Böyük Britaniya, Almaniya, Norveç və digər Avropa ölkələri artıq bu təşəbbüsə dəstək bildiriblər.
Nigar Cəfərli
AZƏRTAC-ın xüsusi müxbiri
Lissabon
Bölmənin digər xəbərləri
