“PRAVDA VOSTOKA” QƏZETİ SOYDAŞIMIZ HAQQINDA MƏQALƏ DƏRC ETMİŞDİR
Məqalədə deyilir ki, A.Məcidovanın valideynləri 1937-ci illərdə Azərbaycandan Türkmənistana sürgün edilmiş, sonra taleyi onu Özbəkistana gətirmişdir. O, Daşkənd Politexnik İnstitutunu bitirdikdən sonra 4 il Çkalov adına Aviasiya İstehsal Birliyinin konstruktor bürosunda işləmiş, bu illər ərzində onlarca səmərələşdirici təklif irəli sürmüş və bütün təkliflər istehsalata tətbiq edilmişdir. Sonra Almaz xanım namizədlik dissertasiyası müdafiə etmiş və müxtəlif rəhbər vəzifələrdə çalışmışdır.
Hazırda A.Məcidova Özbəkistan EA-nın Tətbiqi Lazer Fizikası İnstitutunun marketinq və ekologiya şöbəsinin rəhbəri, eyni zamanda, Daşkənd Hidrometeorologiya Kollecində istedadlı gənclər mərkəzinin direktorudur. O, Azərbaycan Mədəniyyət Mərkəzləri Assosiasiyası İdarə Heyətinin üzvü kimi böyük ictimai iş də aparır.
Gənc nəslin ekoloji təhsilinin pedaqoji əsasları mövzusunda doktorluq dissertasiyası üzərində işləyən Almaz Məcidova müxtəlif istiqamətli təhsil sistemləri üçün ekologiya üzrə proqramlarda və kitablarda Asiya, xüsusən də Mərkəzi Asiya regionu xalqlarının coğrafi-iqlim, sosial, milli, mədəni-tarixi ənənələrini nəzərə almağı vacib sayır.
