PREZİDENT HEYDƏR ƏLİYEV ÖLMƏZ ŞƏXSİYYƏTDİR
-Prezident Heydər Əliyevin dünyasını dəyişməsi xalqımız, bütün türk dünyası üçün çox böyük itkidir. Belə dahi insan min ildə bir dəfə dünyaya gəlir. O, müstəqil dövlətimizin təməlini qoydu, onu möhkəmləndirdi, inkişaf yoluna çıxardı və ən layiqli davamçısına etibar etdi. Bu, çox böyük təsəlli və xoşbəxtlikdir. İndi əminik ki, xalqımız dahi öndərimiz Heydər Əliyevin müəyyənləşdirdiyi yolla gedəcək, onun siyasi kursunun layiqli davamçısı Prezident İlham Əliyevin rəhbərliyi ilə dövlətimiz daha da inkişaf edəcəkdir.
Ümummilli liderimiz, Prezident Heydər Əliyevlə bağlı mənim çoxlu xatirələrim var. Həmin xatirələrdən danışmaq istəyirəm: 1972-ci ildə möhtərəm Heydər Əliyevin dəvəti ilə keçmiş SSRİ Elmlər Akademiyasının prezidenti Mstislav Keldış Bakıya gəlmişdi. O zaman respublikamızın elm və iqtisadiyyatı ilə bağlı bir sıra məsələlər var idi ki, onları operativ həll etmək üçün bizə “BESM-6” markalı hesablayıcı elektron maşın lazım idi. Yenicə buraxılan hesablayıcı maşına çox böyük ehtiyacımız olduğunu Mstislav Keldışə bildirəndə, o dedi ki, doğrudan da, bu maşın sizə lazımdır, ancaq həmin məsələni həll etmək çox çətindir. Çünki onu hələlik ancaq hərbi hissələrə verirlər.
Sonra bizə dedilər ki, hesablayıcı elektron maşınla bağlı bir arayış yazın, Mstislav Keldışlə keçirilən görüşdə Heydər Əliyev həmin arayışdan istifadə etsin.
Arayışı tez-tələsik, bir az da alayarımçıq hazırlayıb Mərkəzi Komitəyə verdik və görüşdə iştirak etmək üçün Dzerjinski adına kluba (indiki mədəniyyət mərkəzi) gəldik. Ürəyimiz əsirdi ki, arayışı yaxşı hazırlamadığımızı bizə irad tutacaqlar.
Görüşdə Heydər Əliyev çıxış edərək Mstislav Keldışin elmi fəaliyyətini o qədər aydın, dəqiq, əhatəli təhlil etdi ki, hamının marağına səbəb oldu. Heç mütəxəssis-alimlər də Keldışin elmi fəaliyyətini belə gözəl təhlil edə bilməzdi. Yalnız bunu dahilər edə bilərdi. Heydər Əliyevin çıxışı Mstislav Keldışə olduqca xoş təsir göstərmişdir. Görüşdən sonra o bizə dedi ki, nə qədər çətin olsa da mən sizə “BESM-6” təşkil edəcəyəm. Beləliklə, Keldışin şəxsi təşəbbüsü və köməyi ilə Azərbaycan Elmlər Akademiyasına həmin hesablayıcı maşın verildi.
Heydər Əliyevin onun haqqında çıxışından sonra Keldış ömrünün sonuna kimi Azərbaycana xüsusi diqqət göstərirdi.
İkinci bir xatirə: 1998-ci ildə mən Sankt-Peterburq şəhərində beynəlxalq simpoziumda iştirak edirdim. Orada akademiklərdən biri mənə dedi ki, siz nə üçün Heydər Əliyevi bu qədər çox sevirsiniz? Cavabında dedim ki, Azərbaycanda elə bir adam tapmaq olmaz ki, Heydər Əliyevə məhəbbəti olmasın. Xüsusilə biz alimlər indiyədək onun qayğısı ilə yaşamışıq. 1993-cü ildə xalqın təkidli tələbi ilə Heydər Əliyev ikinci dəfə hakimiyyətə qayıdan sonra akademiyamız dağılmaq təhlükəsindən xilas olmuşdur.
Mənim bu sözlərimdən sonra həmin akademik də Heydər Əliyevin elmə, təhsilə göstərdiyi qayğıdan danışdı. Dedi ki, Heydər Əliyev dahi bir insandır, onun qədrini bilin.
Görkəmli dövlət xadimi Heydər Əliyev kibernetika sahəsinə də böyük diqqət göstərirdi. O, 20–dən çox cihazqayırma və elektron zavod yaratmışdı. Həmin zavodlar ölkəmizdə elektronika sahəsinin inkişafına geniş imkanlar açmışdır. Heydər Əliyevin rəhbərliyi və fəaliyyəti sayəsində respublikamızın neft maşınqayırma sənayesi dünyada ikinci yerə çıxmışdı və onların avadanlığı 40-dan çox ölkəyə ixrac olunurdu. Heydər Əliyev ölməz bir şəxsiyyətdir, o bizim qəlbimizdə əbədi yaşayacaqdır.
Prezidentimiz İlham Əliyev başda olmaqla, ümummilli liderimiz
Heydər Əliyevin ailə üzvlərinə, xalqımıza və bütün türk dünyasına dərin hüznlə başsağlığı verirəm. Allah rəhmət eləsin.
Bölmənin digər xəbərləri
