“QADIN HÜQUQLARI İNSAN HÜQUQLARININ TƏRKİBHİSSƏSİ KİMİ” MÖVZUSUNDA DƏYİRMİ MASA KEÇİRİLMİŞDİR
Tədbirdə Ailə, Qadın və Uşaq Problemləri üzrə Dövlət Komitəsinin sədri Hicran Hüseynova təşkilatın yerlərdə əhali arasında qadınların maarifləndirilməsi istiqamətində gördüyü işlərdən danışmış, son illər Azərbaycanda dövlət tərəfindən qadın məsələlərinin həllinə xüsusi önəm verildiyini faktlarla diqqətə çatdırmışdır. Qaçqın və məcburi köçkünlərin məskunlaşdığı yerlərdə qadınlar üçün xarici dil və kompyuter kurslarının təşkil edildiyi bildirilmişdir.
İnsan Hüquqları İnstitutunun direktoru, professor Rövşən Mustafayev Ermənistanın Azərbaycana təcavüzünün nəticələrini, ermənilərin islam dinini gözdən salmaq istiqamətində bədniyyət hərəkətlərini qeyd etmişdir.
Dəyirmi masada Milli Məclisin sosial siyasət daimi komissiyasının sədri Hadi Rəcəblinin “Qadınlar və dövlətin sosial siyasəti”, Ədliyyə Nazirliyi İnsan Hüquqları və İctimaiyyətlə Əlaqələr İdarəsinin rəisi Faiq Qurbanovun “Qadın hüquqları sahəsində milli qanunvericiliyin inkişafı”, Milli Məclisin deputatı Elmira Axundovanın “Avropa Şurasının və milli parlamentlərin məişət zorakılığına qarşı birgə mübarizəsi” mövzularında məruzələri, Əsir və itkin düşmüş, girov götürülmüş vətəndaşlarla əlaqədar Dövlət Komissiyasının işçi qrupunun rəhbəri Firudin Sadıqovun qurumun fəaliyyəti haqqında məlumatı dinlənilmişdir.
Çıxışlarda qadın hüquqlarının qorunması istiqamətində Azərbaycanda görülmüş işlərdən danışılmış, bu sahədə respublikamızın və Avropa ölkələrinin qanunvericiliyindəki sənədlər barədə məlumatlar verilmişdir.
Mövzu ilə bağlı müzakirələr, fikir mübadiləsi aparılmış, təkliflər irəli sürülmüşdür.
Sonda AQUPDK-nın və İHİ-nin Ermənistanın Azərbaycana təcavüzü nəticəsində müvəqqəti işğal olunmuş ərazilərimizdə dağıdılmış, viran edilmiş yaşayış məntəqələri, tarixi abidələr, təhsil və səhiyyə ocaqları, maddi sərvətlər, əsir düşmüş qoca, qadın və uşaqlarımızın məruz qaldığı zorakılıqlar barədə BMT-yə, BMT-nin Qaçqınlar üzrə Ali Komissarlığına, BMT-nin İnsan Hüquqları üzrə Ali Komissarına, Avropa Şurasına, Avropada Təhlükəsizlik və Əməkdaşlıq Təşkilatına ünvanlanmış bəyanatı oxunmuş və əsas kimi qəbul edilmiş sənədə əlavələr, düzəlişlər barədə təkliflər verilmişdir.
Bölmənin digər xəbərləri
