QAHİRƏ UNİVERSİTETİNDƏ SEMİNAR
Misir Ərəb Respublikası Xarici İşlər Nazirliyinin və respublikamızın bu ölkədəki səfirliyinin təşəbbüsü ilə Qahirə universitetinin siyasət və iqtisadi elmlər fakultəsində Azərbaycan - Misir münasibətlərinə həsr olunmuş seminar keçirilmişdir.
Açılış mərasimində Azərbaycanın Misirdəki səfiri İsrafil Vəkilov respublikamızın xarici siyasətinin əsas istiqamətlərindən bəhs edərək, Azərbaycan - Misir münasibətlərinin hazırkı vəziyyətindən razılıqla söhbət açmış, hər iki ölkənin bir çox məsələlərə dair mövqeyinin üst-üstə düşdüyünü bildirmişdir.
Səfir demişdir ki, 1994-cü ildən, yəni Azərbaycanın Qahirədə səfirliyi açılandan bəri ölkələrimizin ikitərəfli münasibətlərində səmimi dostluq əhval-ruhiyyəsi hökm sürür və bu münasibətlərdə Azərbaycanın və Misirin Dövlət başçıları Prezident Heydər Əliyevlə Prezident Hüsni Mübarək arasındakı möhkəm dostluq əlaqələri mühüm rol oynayır.
Səfir ölkəmiz üçün ən ağrılı problem olan Ermənistan-Azərbaycan, Dağlıq Qarabağ münaqişəsindən də geniş söhbət açmış, bu münaqişənin tezliklə sülh yolu ilə aradan qaldırılmasında nüfuzlu beynəlxalq təşkilatların səylərinin artırılmasının vacib olduğunu nəzərə çarpdırmışdır. Səfir bildirmişdir ki, hələ ötən ilin 11 sentyabr hadisələrinə qədər Azərbaycan erməni təxribat təşkilatlarının Bakıda və sairə yerlərdə törətdikləri terrorun dəhşətləri ilə dəfələrlə rastlaşmış, bu qəddar terror aktları nəticəsində yüzlərlə azərbaycanlı həlak olmuşdur.
İsrafil Vəkilov demişdir ki, Azərbaycan Prezidenti Heydər Əliyev beynəlxalq terrorizm təhlükəsi barədə dünya ictimaiyyətini dəfələrlə xəbərdar etmiş, ölkəmiz uzun illərdən bəri erməni terrorçularına qarşı mübarizə aparır.
Bölmənin digər xəbərləri
