SİYASƏT
QAHİRƏDƏ GÖRÜŞ
Azərbaycan Respublikasının Qahirədəki səfiri İsrafil Vəkilov Misir Ərəb Respublikası baş nazirinin birinci müavini, ölkənin Kənd Təsərrüfatı naziri, hakim Milli-Demokrat partiyasının baş katibi Yusif Vali ilə görüşmüşdür.
Respublikamızda həyata keçirilən islahatlar barədə hərtərəfli məlumatı olduğunu nəzərə çarpdıran Cənab Vali dedi ki, mən bizim üçün dost ölkə olan Azərbaycandakı sürətli inkişafı mütəmadi olaraq maraqla izləyirəm. Bütün dünyada tanınan, zəmanəmızın ən görkəmli dövlət xadimlərindən biri hesab etdiyim Prezident Heydər Əliyevin başçılığı ilə Azərbaycan bütün çətinlikləri uğurla dəf edərək, iqtisadi çiçəklənməyə doğru inamlı addımlarla irəliləyir. Məhz Prezident Heydər Əliyevin müdrik siyasəti nəticəsində Azərbaycan hazırda öz sürətli iqtisadi inkişafına görə MDB-nin üzvü olan bir çox ölkələrdən irəlidədir.
Nazir Yusif Vali 1994-cü ildən bəri Azərbaycanda torpaq islahatı ilə bağlı həyata keçirilən bütün tədbirləri tam dəstəklədiyini bildirdi. O, Azərbaycanla Misir arasında kənd təsərrüfatı sahəsindəki əməkdaşlıqdan da razılıqla söhbət açdı.