9 saylı Ərazi Ekologiya və Təbii Sərvətlər şöbəsindən
AZƏRTAC-ın müxbirinə bildirmişlər ki, havaların soyuması ilə əlaqədar respublika ərazisindən miqrasiya edən və ya ölkə ərazisində qışlayan subataqlıq quşları tərəfindən “quş qripi” virusunun yayılmasının mümkünlüyünü nəzərə alaraq, Qanıx çayının sol sahil boyu ərazilərdə süni və təbii su tutarlarında növbəti monitorinq keçirilmişdir. Tədbirdə şöbənin mütəxəssisləri ilə yanaşı, Zaqatala rayon Baytarlıq İdarəsinin, rayon Gigiyena və Epidemioloji Mərkəzinin, Qandax kənd ərazi icra nümayəndəliyi və kənd bələdiyyəsinin nümayəndələri də iştirak etmişlər. Monitorinq zamanı qeyd olunan ekoloji problemə dair şübhə doğuran faktlar aşkar edilməmişdir.
Xəstəliyə yoluxma hallarının baş verməməsi üçün hazırda mütəxəssislər tərəfindən xidməti əraziyə daxil olan Balakən, Zaqatala, Qax, Şəki və Oğuz rayonlarında əhali arasında geniş sanitariya-maarifi işi aparılır, xüsusi vərəqələr yayılır. Bundan əlavə, son vaxtlar Balakən sərhəd keçid məntəqəsində qonşu dövlətlərdən ölkə ərazisinə gətirilən quş və quş əti məhsullarına da nəzarət xeyli gücləndirilmişdir.
