QANLI YANVAR FACİƏSİ HƏM DƏ XALQIMIZIN QƏHRƏMANLIQ SALNAMƏSİDİR
Şəhidlərimizin əziz xatirəsi bir dəqiqəlik sükutla yad edildi, onların ruhuna dualar oxundu.
Baş nazirin müavini, Qaçqınların və məcburi köçkünlərin işləri üzrə Dövlət Komitəsinin sədri Əli Həsənov xalqımızın qəhrəman övladlarına Allahdan rəhmət dilədi, ümummilli lider Heydər Əliyevin tövsiyə və tapşırıqlarına uyğun olaraq, şəhid ailələrinə dövlət tərəfindən göstərilən qayğının davam etdirildiyini xatırlatdı. Ə.Həsənov bildirdi ki, 20 Yanvar faciəsi qanlı hadisə olsa da, eyni zamanda, Azərbaycan xalqının tarixinə yazılan qəhrəmanlıq salnaməsidir. Mübariz oğlan və qızlarımız ölkəmizin azadlığı uğrunda canlarını qurban verməklə, xalqımızım şücaət əzmini nümayiş etdirmişlər. Onların ailə üzvlərinə qayğı göstərmək, eləcə də mənəvi dayaq olmaq hər birimizin borcudur.
Bu il yanvarın 20-də şəhidlərimizi anma mərasiminin dövlət tərəfindən təşkil olunacağını deyən komitə sədri söylədi ki, xalqımız faciəsinin ildönümünü yüksək fəallıqla qeyd edəcəkdir. Bundan başqa, ildönümü ərəfəsində ayrı-ayrı müəssisə və təşkilatlarda, eləcə də xarici ölkələrdəki diplomatik korpuslarda mərasimlər keçiriləcəkdir.
Şəhid ailələri adından “20 Yanvar” Fondunun sədri Nəsib Azər və başqaları göstərilən diqqətə və mövcud problemlərin həlli istiqamətində görülən işlərə görə minnətdarlıq etdilər.
Süfrə arxasında davam edən görüşdə onların problemləri dinlənildi. Əli Həsənov bildirdi ki, qaçqın və məcburi köçkün ailələrindən olan şəhid ailələrini və əlilləri pulsuz dərmanla, stasionar müalicə ilə, eləcə də müayinə ilə təmin etmək üçün bundan sonra kömək göstəriləcəkdir.
Sonda 22 şəhid ailəsinə və 8 əlilə maddi yardım verildi.
