QARA DƏNİZ İQTİSADİ ƏMƏKDAŞLIQ TƏŞKİLATI PARLAMENT ASSAMBLEYASININ KONFRANSI KEÇİRİLMİŞDİR
Ombudsman Aparatından AZƏRTAC-a bildirmişlər ki, konfransda QİƏT Parlament Assambleyasının baş katibi Aleksey Kudryavtsev növbəti konfransın Azərbaycan ombudsmanı E.Süleymanovanın Qara dəniz ölkələri ombudsmanlarının bir araya gətirilməsi, insan hüquqları ilə bağlı onların toplantısının təşkili barədə bu qurumun ötən il Kiyevdə keçirilmiş toplantısında irəli sürdüyü təklif əsasında keçirildiyini vurğulamışdır.
Türkiyə Cümhuriyyətinin doqquzuncu prezidenti olmuş görkəmli ictimai–siyasi xadim Süleyman Dəmirəl məruzəsində ombudsmanların bütün bölgədə sülh və inkişafa nail olunmasında mühüm rol oynayacağına ümid bəslədiyini vurğulamış, yaxın vaxtlarda Türkiyədə də ombudsman təsisatının yaradılacağını söyləmişdir.
Albaniya, Bolqarıstan, Ukrayna, Moldova, Gürcüstan və Yunanıstanın ombudsmanları, habelə Rusiya Federasiyası və Rumıniya ombudsmanlarının nümayəndələri konfransda çıxış etmiş, fikir və təcrübə mübadiləsi aparmışlar.
E.Süleymanova Azərbaycanda sosial problemlərin həllində, demokratiyanın inkişafında, insan hüquq və azadlıqlarının təmin edilməsində Omdudsmanın rolundan danışmışdır. O, təcridxanalarda, müvəqqəti saxlama yerlərində, cəzaçəkmə müəssisələrində insan hüquqlarının pozulması hallarının araşdırılması məqsədi ilə ombudsmanın çevik araşdırma qrupunun yaradıldığını bildirmişdir.
Müvəkkil 18 il davam edən hərbi münaqişə nəticəsində Azərbaycanda 80 millət və etnik qrupdan ibarət 8,5 milyonluq əhalinin hər səkkiz nəfərindən birinin qaçqına və məcburi köçkünə çevrildiyini, bu münaqişənin böyük insan tələfatı, maddi, mənəvi və mədəni dəyərlər itkisi, insan hüquqlarının kütləvi şəkildə pozulması ilə nəticələndiyini diqqətə çatdırmışdır.
E.Süleymanova insan hüquqları ilə bağlı müxtəlif mövzular üzrə toplantıların müntəzəm olaraq keçirilməsini, Qara dəniz ölkələri ombudsmanlarının əməkdaşlığının strategiyasını, prioritet istiqamətlərini müəyyənləşdirməyi təklif etmişdir Tədbir istirakçıları QİƏT-ə üzv dövlətlərin ombudsmanlarının bəyanatını qəbul etmişlər.
İstanbulun Milli Saraylar başkanı Cemal Öztaş konfrans iştirakçılarını qəbul etmişdir. O, İstanbul muzeylərinin ekspozisiyaları üzrə Azərbaycanda səyyar sərgilərin təşkilini razılıqla qarşılamışdır.
Bölmənin digər xəbərləri
