Bakı, 7 noyabr, AZƏRTAC

Bu ilin əvvəlindən Qarabağ Dirçəliş Fondu (QDF) bir sıra xarici ekspertlərlə birlikdə “Qarabağın səsi” adı altında hərtərəfli çoxkanallı kommunikasiya strategiyasının hazırlanması üzərində işə start verib.

QDF-dən AZƏRTAC-a bildiriblər ki, həmin strategiya Qarabağ həqiqətləri, irimiqyaslı bərpa layihələrinin gedişatı, eləcə də onların bütün regionun davamlı gələcəyinin qurulmasına təsiri haqqında məlumatların ölkə daxilində və xaricində təşviq olunmasına xidmət edəcək.

Bu işlərə Qarabağ Dirçəliş Fondunun Nizamnaməsinin 1.1-ci bəndinə uyğun olaraq başlanılıb (Azərbaycan Respublikasının işğaldan azad edilmiş ərazilərinin bərpası və yenidən qurulması, habelə dayanıqlı iqtisadiyyata və yüksək rifaha malik regiona çevrilməsi istiqamətində həyata keçirilən işlərlə bağlı ölkə daxilində və ölkə xaricində informasiya təminatını, maarifləndirmə və zəruri təşviqat işlərini həyata keçirmək).

Qeyd edək ki, bu kommunikasiya strategiyasının həyata keçirilməsi müstəsna olaraq Fondun investisiya fəaliyyətindən əldə etdiyi və 2022-ci ilin sonunda 34,454,187 AZN təşkil edən mənfəət hesabına həyata keçiriləcək (maliyyə göstəriciləri haqqında ətraflı məlumatı bu ünvanda yerləşən maliyyə hesabatlarından əldə etmək mümkündür). Fonda edilən ianələrdən istifadə bu işlərin həyata keçirilməsi üçün nəzərdə tutulmayıb.

Birinci mərhələsi 2023-2025-ci illəri əhatə edən “Qarabağın səsi” kommunikasiya strategiyasının ümumi məqsədlərini aşağıdakı kimi xarakterizə etmək olar:

1. Bərpa işlərinin gedişatı və nəticələri haqqında məlumatın həm ölkə daxilində, həm də xaricdə geniş auditoriyaya çatdırılması, habelə münaqişədən sonrakı ərazilərin dirçəldilməsi sahəsində Azərbaycanın qabaqcıl təcrübəsinin təbliği;

2. Şəffaf kommunikasiya fəaliyyəti ilə Azərbaycan ictimaiyyətinin geniş təbəqələrinin Qarabağın dirçəliş prosesinə dəstəyinin təmin edilməsi;

3. Azərbaycanın Cənubi Qafqazda davamlı sülhdə maraqlı olan ölkə kimi beynəlxalq müsbət imicinin gücləndirilməsi;

4. Yerli və xarici donorlar, investorlar və tərəfdaşlardan əlavə resursların cəlb edilməsi;

5. Ermənistan və digər dost olmayan qüvvələrin yaydığı dezinformasiyaya qarşı mübarizə;

6. Qarabağ Dirçəliş Fondunun müsbət imicinin təbliği.

Bu strategiyanın  əsas hədəf auditoriyası aşağıdakı kimi təsvir edilə bilər:

Daxili auditoriya:

• Rəsmi şəxslər;

• Rəy liderləri və ictimai xadimlər;

• Kommersiya strukturları və fərdi sahibkarlar;

• Media, jurnalistlər, tədqiqatçılar;

• Beynəlxalq təşkilatların və yerli QHT-lərin nümayəndəlikləri;

• Gənclər və tələbələr;

• Cəmiyyətin digər təbəqələri.

Xarici auditoriya:

• Beynəlxalq təşkilatlar və diplomatlar;

• Beynəlxalq korporasiyalar, QHT-lər, fondlar və xeyriyyə təşkilatları (potensial donorlar və investorlar);

• Regionu işıqlandıran media və jurnalistlər;

• Səyahət blogerləri və potensial turistlər;

• Münaqişədən sonrakı zonaların inkişafını öyrənən alim və tədqiqatçılar;

• Azərbaycan diasporu.

• Cəmiyyətin digər təbəqələri.

Kommunikasiya strategiyası çərçivəsində müxtəlif layihələrin, o cümlədən aşağıdakı təşəbbüslərin həyata keçirilməsi planlaşdırılır:

1. Qarabağda və Şərqi Zəngəzurda bərpa işlərinin gedişatına həsr olunmuş Revival.az universal kommunikasiya platformasının yaradılması (layihə hazırlanır);

2. Yerli və xarici mediada mütəmadi olaraq informasiya (PR) dəstəyi;

3. Qarabağın və Şərqi Zəngəzurun erməni işğalından azad edilməsinə, bərpa işlərinə, regionun gələcəyinə dair planlara və vizyona, Azərbaycanın bu sahədəki təcrübəsinə həsr olunmuş “Qarabağın Dirçəlişi: Faciədən Zəfərə” adlı “ağıllı” kitabın yaradılması;

4. “Birlikdə Qarabağ üçün!” şüarı altında telemarafonların keçirilməsi (layihə hazırlanır);

5. Sənədli filmlərin yaradılması və beynəlxalq kinofestivallarda nümayişi (layihə hazırlanır);

6. Post-münaqişə ərazilərinin bərpasında Azərbaycanın qabaqcıl təcrübəsini nümayiş etdirmək üçün xarici sərgilərdə iştirak (layihə hazırlanır).

Bu strategiya çərçivəsində işlərin başlanmasına gəlincə, qeyd edək ki, ilk növbədə “Qarabağın Dirçəlişi: Faciədən Zəfərə” adlı kitabın yaradılması üzrə işlərə başlanılıb.

Bu layihə təkcə kitab yazılması deyil, həm də xüsusi internet platformasının yaradılması, kitabın müxtəlif çap və rəqəmsal formatlarda nəşri, Azərbaycanda və xaricdə təqdimatı və yayılması və s. istiqamətlər üzrə işləri əhatə edir.

Xüsusilə, layihəyə aşağıdakı komponentlər daxildir:

• Arxivlərdə müvafiq araşdırmaların aparılması və Azərbaycanda və xaricdə 50-dən çox müsahibənin aparılması;

• Kitabın ingilis dilində yazılması;

• Kitabın Azərbaycan, türk və rus dillərinə tərcüməsi;

• Kitabın 6000 ədəddən çox sayda xüsusi hədiyyəli sərt üzlü (VIP), standart sərt və yumşaq üz qabığı formatlarında nəşri;

• Kitabın elektron versiyasının PDF, EPUB, MOBI, KINDLE formatlarında nəşri;

• Arxiv sənədlərinin, müsahibələrin videoyazılarının, interaktiv xəritələrin və digər rəqəmsal məzmunun mövcud olacağı, linklər, QR kodlar, heşteqlər, daxil edilmiş məzmunlar vasitəsilə kitabın elektron və çap nəşrləri ilə əlaqələndiriləcək internet platformasının yaradılması;

• Bakıda və xaricdə kitab təqdimatlarının keçirilməsi;

• Sosial şəbəkələrdə və axtarış xidmətlərində genişmiqyaslı kampaniyanın aparılması.

Kitabın nəşri aşağıdakı məqsədlərə çatmağa imkan yaradacaq:

• Azərbaycanın erməni işğalçı qüvvələri üzərində tarixi Zəfərinin əsas nailiyyətlərini sənədləşdirmək;

• Azərbaycanın Qarabağ və Şərqi Zəngəzurun bərpası üzrə səylərini və regionda sonrakı müsbət dəyişiklikləri əks etdirmək;

• Oxucuları münaqişədən sonrakı quruculuqla bağlı çağırışlar və çətinliklər haqqında məlumatlandırmaq;

• Azərbaycan xalqının mədəniyyətini nümayiş etdirmək (xüsusən də Qarabağ bölgəsi kontekstində);

• Münaqişədən sonrakı digər zonalarda mümkün tətbiqi üçün yenidənqurma işlərində Azərbaycan təcrübəsini təbliğ etmək və s.

Qeyd edək ki, layihənin təşəbbüskarı və müəllifi Azərbaycan və Ermənistan-Azərbaycan münaqişəsi həqiqətləri ilə yaxından tanış olan britaniyalı müəllif Qrem Vilsondur. Q.Vilson Azərbaycan haqqında müxtəlif əsərlərin, o cümlədən Prezident İlham Əliyevin bioqrafiyası “A Portrait of a President”, Ümummilli Lider Heydər Əliyevin həyatından bəhs edən “The Rise and Fall and Rise Again of Heydar Aliyev and Azerbaijan”, “Azərbaycan Xalq Cümhuriyyəti: heç vaxt ölməyən arzu” kitabı, həmçinin Ermənistanın işğalçı rejiminin Qarabağdakı qanunsuz fəaliyyətinə dair materialların müəllifidir.

Kitabın yaradılması üzrə işlərə başlamaq üçün bu kompleks layihənin təşəbbüskarı və müəllifi kimi çıxış edən Q.Vilsonun rəhbərlik etdiyi “Media Prima Advertising” şirkəti ilə müqavilə bağlanmışdır. Müqavilə “Dövlət satınalmaları haqqında” Azərbaycan Respublikası Qanununun tələblərinə tam uyğun olaraq, xidmətlərin göstərilməsinin bir mənbə üsulu ilə bağlanıb (kitabın yazılması və yayılması üzrə təcili zərurəti və bu layihə üzrə müəllif hüquqlarının Media Prima şirkətinə məxsus olduğunu nəzərə alaraq). Daha ətraflı məlumat etender.gov.az saytında əldə oluna bilər.

“Media Prima Advertising” şirkəti başqa ölkənin rezidenti olduğu üçün müqavilənin yuxarıda göstərilən işlərdən əlavə, müqavilənin dəyərinə (1 milyon 178 min 672 AZN) əlavə dəyər vergisi (18 faiz) və ödəmə vergisi (10 faiz) daxildir.

Qarabağ Dirçəliş Fondu bütövlükdə “Qarabağın səsi” kommunikasiya strategiyasının, eləcə də onun ayrı-ayrı komponentlərinin həyata keçirilməsi üzrə işlərin gedişatı barədə ictimaiyyətə məlumat verəcək.