Qarabağ müharibəsi əlilləri yeni minik avtomobilləri ilə təmin olunublar
Bakı, 9 aprel, AZƏRTAC
Bu vaxta qədər nazirlik tərəfindən 6 min nəfərdən çox müharibə əlili və onlara bərabər tutulan şəxsə minik avtomobili verilib.
Əmək və Əhalinin Sosial Müdafiəsi Nazirliyi tərəfindən 120 ədəd “Naz-LİFAN” markalı minik avtomobilini, o cümlədən 117 ədədi Qarabağ müharibəsi, 3 ədədi isə 20 Yanvar hadisələri zamanı əlil olanların ailələrinə təqdim olunub.
Nazirliyin ictimaiyyətlə əlaqələr şöbəsindən AZƏRTAC-a verilən məlumata görə, yeni minik avtomobillərinin təqdim olunması tədbirində Nazirlik yanında fəaliyyət göstərən İctimai Şuranın üzvləri, əlil ictimai birliklərinin rəhbərləri iştirak ediblər.
Tədbirdə bildirilib ki, sosial dövlət statusunu gücləndirən Azərbaycanda bütün sosial proqramlar uğurla davam etdirilərək getdikcə genişləndirilir, əhalinin sosial müdafiəsinin gücləndirilməsi istiqamətində mühüm addımlar atılır. Ölkəmizin ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlil olmuş şəxslər də etibarlı sosial müdafiə sistemi ilə əhatə olunmaqla, onların həyat şəraitlərinin yaxşılaşdırılması sahəsində məqsədyönlü tədbirlər həyata keçirilir. Həmin tədbirlərin bir istiqaməti də onların minik avtomobilləri ilə təmin edilməsinə yönəlib.
Azərbaycan Prezidentinin 23 dekabr 2013-cü il tarixli və 30 aprel 2014-cü il tarixli Sərəncamları müharibə əlilləri və onlara bərabər tutulanların dövlət büdcəsi hesabına minik avtomobilləri ilə təminatında əhəmiyyətli irəliləyişə imkan verib. Sərəncamlardan sonra 2,2 min ədədə yaxın “Naz-LİFAN” markalı minik avtomobili həmin təbəqəyə məxsus olanlara təqdim edilib. Nəticədə dövlət büdcəsi hesabına minik avtomobili almaq üçün Əmək və Əhalinin Sosial Müdafiəsi Nazirliyində 2014-cü ilədək növbəyə dayananlarla bərabər, artıq 2015-ci ildə növbəyə dayanmış müharibə əlilləri və onlara bərabər tutulanlardan da bir hissəsinin avtomobillə təminatına nail olunub.
Ümumilikdə isə indiyə qədər nazirlik tərəfindən 6 min nəfərdən çox müharibə əlili və onlara bərabər tutulanlar minik avtomobili ilə təmin edilib. Onların minik avtomobili ilə təminatı Əmək və Əhalinin Sosial Müdafiəsi Nazirliyinin rəsmi saytında (www.mlspp.gov.az) təqdim olunan növbəlilik siyahıları əsasında, tam şəffaflıq və ictimai nəzarət şəraitində həyata keçirilir.
Tədbirdə müharibə əlilləri və şəhid ailələrinin yeni mənzillərlə təminatı işlərindən də bəhs edilib. Qeyd olunub ki, dövlət başçısının tapşırıqlarına əsasən həmin sahədə də görülən tədbirlər ildən-ilə gücləndirilir. İndiyədək Əmək və Əhalinin Sosial Müdafiəsi Nazirliyinin xətti ilə 6,1 mindən çox əlil və şəhid ailəsi müasir tələblərə uyğun yeni mənzillərlə təmin olunublar.
Tədbirdə əlil ictimai birliklərinin rəhbərləri əlillərin, o cümlədən müharibə əlilləri və onlara bərabər tutulanların sosial təminatlarının gücləndirilməsi məqsədilə dövlət başçısının imzaladığı Fərman və Sərəncamların, həmin şəxslərin, habelə şəhid ailələrinin rifah halının yaxşılaşdırılmasına yönələn tədbirlərin ictimaiyyət tərəfindən də rəğbətlə qarşılandığını söyləyiblər.
Bölmənin digər xəbərləri
