Qarabağdakı alban abidələrinin tarixi və maddi-mədəni irsi AMEA-da araşdırılıb
Bakı, 23 sentyabr, AZƏRTAC
Azərbaycan Milli Elmlər Akademiyasında (AMEA) “Azərbaycanın Qarabağ ərazisində alban abidələri: tarixi reallıq və erməni saxtakarlığı” mövzusunda elmi konfrans təşkil olunub.
AZƏRTAC xəbər verir ki, konfransda AMEA-nın prezidenti akademik İsa Həbibbəyli ermənilərin alban irsinə aid abidələrdə saxtalaşma apardıqlarından danışıb. Akademik deyib: “Tarixi abidələrə süni şəkildə kobud müdaxilələr edilir, onların üzərinə yalançı kitabələr həkk olunur. Əsl tarixi kitabələr isə vaxtilə oğurlanaraq İrəvana aparılıb, dəyişdirilib və abidələrin həqiqi mətnləri təhrifə məruz qoyulub. Hətta son dövrlərdə bu abidələri qəsdən zədələyərək guya erməni irsinə aid olması barədə yalan təsəvvür formalaşdırmağa çalışırlar. Bütün bunlar Qafqaz Albaniyası tarixinə yönəlmiş əsassız erməni iddialarının və tarixi saxtakarlığın növbəti bariz nümunəsidir”.
Akademik İsa Həbibbəyli torpaqlarımız işğaldan azad edildikdən sonra AMEA-nın Arxeologiya və Antropologiya İnstitutu tərəfindən arxeoloji ekspedisiyaların təşkil olunduğunu, ərazidə genişmiqyaslı qazıntı işlərinə başlanıldığını, alimlərimiz müstəqillik dövrünün tələblərinə uyğun olaraq alban abidələrini yenidən dərindən və elmi əsaslarla tədqiq etdiklərini bildirib: “Məhz bu elmi həqiqətlərin üzə çıxarılması Ermənistan tərəfini ciddi şəkildə narahat edir. Ermənistan tərəfinin Azərbaycan ərazisində olan Qafqaz Albaniyası abidələrinə dair irəli sürdükləri iddiaları qətiyyətlə pisləyir və bu səslənən fikirləri qeyri-elmi, tarixə əsaslanmayan fikirlər kimi rədd edirik”.
Sonra AMEA Arxeologiya və Antropologiya İnstitutunun direktoru dosent Fərhad Quliyev, A.A. Bakıxanov adına Tarix və Etnologiya İnstitutunun Atropatena-Albaniya (Qafqaz) tarixi şöbəsinin müdiri tarix elmləri doktoru, Ramil Ağayev, Azərbaycanın qədim dövr tarixi şöbəsinin müdiri Ramin Əlizadə və Memarlıq və İncəsənət İnstitutunun aparıcı elmi işçisi dosent Telman İbrahimov çıxış edib. Çıxışlarda Qafqaz Albaniyasının tarixi və maddi-mədəni irsinin tədqiqi, bu irsin Azərbaycan xalqının dövlətçilik və mədəniyyət tarixindəki yeri, işğal dövründə Azərbaycan ərazilərində tarixi-mədəni irsin saxtalaşdırılması və mənimsənilməsi cəhdləri ilə bağlı məsələlərə geniş toxunulub. Bildirilib ki, müxtəlif dövrlərə aid arxeoloji abidələrin, alban xristian məbədlərinin, qəbirüstü nümunələrin və digər maddi-mədəni irs obyektlərinin mənsubiyyətinin dəyişdirilməsi, tarixi faktların təhrif olunması və bu abidələrin başqa mədəniyyətlərin irsi kimi təqdim edilməsi cəhdləri elmi araşdırmalarla üzə çıxarılır.
Qeyd olunub ki, Azərbaycan alimlərinin işğaldan azad edilmiş ərazilərdə apardıqları arxeoloji tədqiqatlar, aşkar edilən maddi nümunələr və yazılı mənbələrin müqayisəli təhlili Qafqaz Albaniyasının tarixi, dini və mədəni irsi ilə bağlı yeni elmi faktların üzə çıxarılmasına imkan verir.
Konfransın yekununda AMEA-nın prezidenti, akademik İsa Həbibbəyli elmi konfransın materiallarının nəşr edilməsi, Qafqaz Albaniyası irsinin fundamental əsaslarla tədqiqi və erməni saxtakarlıqlarına qarşı sistemli elmi mübarizənin təşkili məqsədilə Akademiyada kompleks tədbirlər planının hazırlanması barədə tapşırıq verib.
Bölmənin digər xəbərləri
