Qaxda indiyədək 12,3 min hektardan çox sahədə payız səpini aparılıb
Qax, 23 noyabr, Mustafa Dadaşov, AZƏRTAC
Qax rayonunun təsərrüfatlarında 2023-cü ilin məhsulu üçün payızlıq dən bitkilərinin səpini yekunlaşmaq üzrədir. Cari ildə rayonda gələn ilin məhsulu üçün 13,5 min hektar sahədə payızlıq dənli bitkilərin səpini proqnozlaşdırılır. Torpaq mülkiyyətçiləri indiyədək 8 min 370 hektarı buğda, 3 min 965 hektarı dən üçün arpa olmaqla, 12 min 335 hektar sahəyə toxum səpiblər. Bu günədək səpin proqnozuna 91,4 faiz əməl olunub.
Bu barədə AZƏRTAC-ın bölgə müxbirinə Qax Dövlət Aqrar İnkişaf Mərkəzinin bitkiçilik sektorunun müdiri Eyvaz Aslanov məlumat verib.
Qurum rəsmisinin sözlərinə görə, səpin aparılacaq sahələrin şumlanması artıq başa çatdırılıb. Ümumilikdə, səpin kampaniyasına 200-dək traktor, 55 ədəd toxumsəpən aqreqat və digər texnikalar cəlb edilib.
Sektor müdiri bildirib ki, təsərrüfatlarda tütün yığımı da başa çatmaq üzrədir. Cari mövsümdə rayonda “Azərtütün” ASC tərəfindən 131 hektar, “Zaqatala AGRO Industry” MMC tərəfindən 132,3 hektar, fərdi qaydada isə 110 hektar olmaqla, ümumilikdə, 373,3 hektar sahədə tütün əkilib. Fermerlər mövsümün əvvəlindən indiyədək emal məntəqələrinə 2391,2 ton yaş tütün təhvil veriblər. Məntəqələrdə bu günədək yaş tütün kütləsindən 265,6 ton quru tütün istehsal olunub.
Bölmənin digər xəbərləri
