QAXDA MEŞƏLƏRİN MÜHAFİZƏSİ VƏ BƏRPASINA DİQQƏT ARTIRILIR

04.12.2003 [12:00]
Çap et
A⁺ A^-

Qax meşə mühafizəsi və bərpası idarəsindən AZƏRTAC-ın müxbirinə bildirmişlər ki, hazırda rayonda Dövlət Meşə Fonduna aid 31 min hektara yaxın meşə sahəsi vardır. Ekologiya və Təbii Sərvətlər Nazirliyinin xüsusi göstərişinə əsasən, rayonun meşələrində bütün növ qırıntılar dayandırılmış, intensiv meşə əkinlərinin salınmasına başlanmışdır. Bu il rayonda 340 hektar ərazidə yeni meşəliklərin salınması planlaşdırılmışdır. Meşə salınması 250 hektar sahədə təbii bərpa, 90 hektar sahədə isə mədəni meşə əkini və səpini yolu ilə həyata keçirilir. İndiyə qədər əkin üçün nəzərdə tutulmuş 40 hektar sahənin 31 hektarında 30 minə yaxın toxum və ting əkilmişdir.

Cari ildə 11 hektar sahədə tingliklərin də salınması planlaşdırılmışdır. Yaz aylarında bu sahənin yarısında səpin həyata keçirməklə, 900 minə yaxın ting yetişdirilmişdir. Bu iş payız aylarında da davam etdirilmiş və səpin başa çatdırılmışdır. Tingliklərdə, əsasən, rayonun meşələri üçün səciyyəvi sayılan qoz, şabalıd, palıd, həmçinin cökə, qovaq, akasiya, katalpa və sair qiymətli ağac növlərinin tingləri yetişdirilir.

Payız-qış mövsümünün gəlməsi ilə əlaqədar olaraq, rayonun təhsil və səhiyyə ocaqlarının, şəhid ailələrinin odun yanacağına tələbatını ödəmək məqsədi ilə müəssisə qurumuş ağacların və seyrəltmə nəticəsində yaranmış tör-töküntülərin hesabına 1500 kubmetr odun ayıraraq paylamışdır.

QAXDA MEŞƏLƏRİN MÜHAFİZƏSİ VƏ BƏRPASINA DİQQƏT ARTIRILIR

MÜƏLLİFLƏ ƏLAQƏ

Bölmənin digər xəbərləri