Dövlətimizin başçısı Azərbaycanın regionun təhlükəsizliyi sahəsində və hərbi imkanları baxımından lider ölkə kimi saxlamaq üçün ciddi addımlar atır

Bakı, 8 avqust, AZƏRTAC

Prezident İlham Əliyev avqustun 7-də Dövlət Sərhəd Xidmətinin (DSX) Sərhəd Qoşunlarının “Qazax” Əlahiddə Sərhəd Diviziyasının qarnizon kompleksində yaradılan şəraitlə tanış olub.

Mövzunu AZƏRTAC-a şərh edilən hərbi ekspert Ədalət Verdiyev söyləyib ki, Silahlı Qüvvələrin Müzəffər Ali Baş Komandanı İlham Əliyev üçün respublikamızın təhlükəsizliyinin təmin edilməsi ən prioritet vəzifə kimi daim gündəmdədir. Vətən müharibəsinin Azərbaycanın parlaq Qələbəsi ilə başa çatmasına baxmayaraq, Prezidentimiz dövlətin hərbi potensialının artırılması və sərhədlərin etibarlı mühafizəsinin təşkili üçün kifayət qədər ciddi addımlar atır.

“Dövlətimizin başçısı işğaldan azad olunmuş ərazilərin bərpa olunması, həmin bölgələrdə hərbi infrastrukturun yaradılması ilə paralel digər regionları da diqqət mərkəzində saxlayır. Hazırda böyük hərbi infrastruktur layihələri həyata keçirilir. DSX-nin Sərhəd Qoşunlarının “Qazax” Əlahiddə Sərhəd Diviziyasının qarnizon kompleksində yaradılan şərait buna ən bariz nümunədir. 20,5 hektar ərazini əhatə edən hərbi hissə kompleksində qərargah binası, 5 binadan ibarət 146 mənzilli yaşayış kompleksi, yeməkxana, hamam, camaşırxana və tibb məntəqəsindən ibarət əsgər yataqxanası, şəxsi heyətin xidmətinin yüksək səviyyədə aparılması üçün lazımi şəraitlə təmin edilmiş iş otaqları tikilib. Bununla yanaşı, kompleksin ərazisində helikopter meydançası, hərbi texnikaların saxlanması üçün avtomobil parkı, avtomobil yuma və yanacaqdoldurma məntəqələri, silah, ərzaq və əşya-geyim anbarları, içməli su anbarı, qazanxana binası mövcuddur. Kompleksin idman şəhərciyində hərbi qulluqçuların idmanla məşğul olmaları üçün zəruri avadanlıq quraşdırılıb və voleybol meydançası yaradılıb.

İstilik sistemi, daimi su və elektrik enerjisi ilə təmin edilən kompleksdə ehtiyat generatorlar quraşdırılıb. Ərazidə əsaslı tikinti-abadlıq işləri aparılıb, 23 min kvadratmetr sahə asfaltlanıb, geniş yaşıllıq salınıb, ağaclar əkilib”,- deyə hərbi ekspert bildirib.

Onun sözlərinə görə, burada xidmətin yüksək səviyyədə aparılması, şəxsi heyətin döyüş qabiliyyətinin təkmilləşdirilməsi, peşəkar vərdişlərinin daha da inkişaf etdirilməsi üçün hərtərəfli şərait yaradılıb. Eyni zamanda, dövlətimizin başçısına “Qazax” Əlahiddə Sərhəd Diviziyasının xidməti istifadəsinə verilmiş silah arsenalı, döyüş texnikaları, yüksəkkeçidli nəqliyyat vasitələri, zirehli və avtomobil texnikası, tibb avtomobilləri nümayiş etdirilib. İnşa edilən diviziya Qərb rayonları ilə Ermənistan arasındakı sərhədin etibarlı və dayanıqlı mühafizəsini təmin etmək üçün bütün elementlərə malikdir. Görülən bu tədbirlər Azərbaycanın təhlükəsizliyinin regional və qlobal miqyasda təmin edilməsinə yönələn addımlar hesab olunur. Qarabağ, Zəngəzur və digər rayonların ərazisində yerləşən sərhəd bölgələrində yaradılan yeni infrastruktur isə Azərbaycanının 2010-cu ildən qüvvədə olan Hərbi Doktrinasına və respublikamızın milli təhlükəsizliyinin təminatı strategiyasına tamamilə uyğundur. Dövlətimizin başçısı Azərbaycanın bundan sonra da regionun təhlükəsizliyi sahəsində və hərbi imkanları baxımından lider ölkə kimi saxlamaq üçün ciddi addımlar atır. Eyni zamanda, beynəlxalq və regional sülhə töhfə verməsi üçün Azərbaycan Silahlı Qüvvələrinin imkan və potensialının artırılması üçün kifayət qədər böyük hərbi infrastruktur layihələri reallaşdırılır.