REGİONLAR
Xalq Cümhuriyyəti parlamenti Azərbaycan xalqının qürur mənbəyinə çevrilib
Quba, 25 may, Elxan Yusifli, AZƏRTAC
1918-1920-ci illərdə fəaliyyət göstərən Azərbaycan Xalq Cümhuriyyəti parlamenti həm qanunvericilik, həm demokratiya, həm də milli dövlətçilik sahəsində bir çox ilklərə imza atmaqla, nəinki XX əsrin əvvəllərində, hətta indinin özündə belə bir çox Avropa dövlətləri üçün nümunə ola biləcək parlament yaratdı. Bu, böyük tarixi əhəmiyyət daşıyan hadisə idi.
AZƏRTAC-ın bölgə müxbiri xəbər verir ki, bu barədə Bakı Dövlət Universitetinin (BDU) Tarix fakültəsinin və Quba Soyqırımı Memorial Kompleksinin birgə təşkilatçılığı ilə 28 May - Müstəqillik Gününə həsr olunan “Müsəlman Şərqinin ilk parlamentli respublikası tarixi tədqiqatlarda” mövzusunda Respublika elmi-praktik konfransında bildirilib.
Konfransda soyqırımı qurbanlarının və torpaqlarımızın azadlığı uğrunda canından keçən şəhidlərimizin xatirəsi 1 dəqiqəlik sükutla yad edilib, cümhuriyyət fədailərinə həsr edilən sənədli filim nümayiş olunub.
Tədbir Azərbaycan Xalq Cümhuriyyətinin tarixini, eləcə də XX əsr soyqırımı həqiqətlərini bir daha yada salmaq, regionda elm və tarixin inkişafına dəstək olmaq, həmçinin Azərbaycan Xalq Cümhuriyyətinin fəaliyyəti ilə bağlı araşdırma aparan alim və tədqiqatçıları bir araya gətirmək məqsədilə təşkil edilib.
Kompleksin direktoru Rəxşəndə Bayramova bildirib ki, 1918-ci il mayın 28-də müsəlman Şərqində ilk demokratik, hüquqi və dünyəvi dövlətin məhz Azərbaycanda elan edilməsi, yüksək sosial-mədəni, iqtisadi tərəqqiyə, vətəndaş cəmiyyətinin formalaşmasına təkan verən çoxşaxəli islahatların ölkəmizdə gerçəkləşdirilməsi xalqımızın zəngin dövlətçilik ənənələrinə, yüksək milli qürura, yenilikçi düşüncə tərzinə malik olmasının parlaq təcəssümüdür.
Tarix fakültəsinin dekanı İbrahim Zeynalov Azərbaycan Xalq Cümhuriyyəti kimi, onun parlamentinin də özünəməxsus tarixi yol keçdiyini qeyd edib. Xalq Cümhuriyyəti parlamenti qısa müddətdə fəaliyyət göstərməsinə baxmayaraq, onun gördüyü mühüm işlər Azərbaycan tarixində silinməz izlər qoyub. Ona görə də Xalq Cümhuriyyəti parlamenti Azərbaycan xalqının qürur mənbəyinə çevrilib.
Qeyd olunub ki, 2021-ci il oktyabrın 15-də Milli Məclis Prezident İlham Əliyevin təşəbbüsü ilə “Müstəqillik Günü haqqında” yeni Qanunu təsdiqlədi. Qanuna əsasən, mayın 28-i Müstəqillik Günü, oktyabrın 18-i isə Müstəqilliyin Bərpası Günü elan olunub.
Konfrans digər çıxışlarla davam edib.