Bakı, 25 may, AZƏRTAC

Bakıda voleybol məşqçiləri üçün keçirilən Beynəlxalq Voleybol Federasiyasının (FIVB) Level-1 seminarı başa çatıb.

AZƏRTAC xəbər verir ki, mayın 20-dən 24-nə kimi davam edən tədbir FIVB-nin dəstəyi və Azərbaycan Voleybol Federasiyasının (AVF) təşkilatçılığı ilə keçirilib.

Seminarda Bakı və bölgələrdən olan məşqçilərlə yanaşı, Türkiyə, Avstraliya, İran, Hindistan və Belarusdan ümumilikdə 40-a yaxın mütəxəssis iştirak edib. Seminara FIVB-nin məşqçi-instruktoru Cengiz Akarçeşme və yeniyetmə, gənc oğlanlardan ibarət milli komandaların rəhbəri Cahangir Seyed Abbasi rəhbərlik ediblər.

Seminar nəzəriyyə və təcrübədən ibarət olub. Mayın 23-də iştirakçılar praktiki yoxlamadan keçiblər. Burada lazımi bal toplayan mütəxəssislər nəzəri imtahanda iştirak haqqı qazanıblar. Mayın 24-də keçirilən son imtahandan sonra isə yüksək nəticə göstərmiş iştirakçılar müəyyənləşiblər. İmtahanda iştirak edən 38 nəfərdən 35-i FIVB-nin Level-1 dərəcəli beynəlxalq sertifikatına layiq görülüb. Digərlərinə isə iştirakçı sertifikatı verilib.

İmtahanlardan sonra seminarın bağlanış mərasimi baş tutub. GİN-nin Voleybol Mərkəzində təşkil olunan tədbiri giriş nitqi ilə açan AVF-nin baş katibi Faiq Orucov bu cür seminarların həm də yerli məşqçilər üçün böyük təcrübə olduğunu diqqətə çatdırıb. Federasiya rəsmisi sertifikat ala bilməyən iştirakçılara öz üzərilərində daha yaxşı çalışmağı tövsiyə edib, onların növbəti seminarlarda uğurlu nəticə əldə edəcəklərinə əminliyini bildirib.

Cengiz Akarçeşme və Cahangir Seyed Abbasi isə AVF-nin beynəlxalq seminarlara ev sahibi etməsinin yerli məşqçilərin təcrübələrinin artırılması üçün yaxşı fürsət olduğunu bildiriblər.

Sonda Level-1 sertifikatı alan iştirakçılara diplomlar təqdim olunub və xatirə şəkli çəkilib.

Qeyd edək ki, bu Azərbaycanda keçirilən dördüncü FIVB Level-1 seminarıdır.