“Qazax” Elektrik Şəbəkəsi Müəssisəsində tədbirlər davam etdirilir
Bakı, 12 noyabr (AZƏRTAC). Elektrik enerjisinin daha da keyfiyyətli paylanması üçün və elektrik verilişi xətlərində texnoloji itkilərin aradan qaldırılması məqsədi ilə “Qazax” Elektrik Şəbəkəsi Müəssisəsində mühüm tədbirlər icra edilməkdədir.
“Azərenerji” ASC-nin mətbuat xidmətindən AZƏRTAC-a bildirmişlər ki, cari ilin 9 ayı ərzində 156 qayda pozuntusu faktı aşkar olunmuş, 580,7 min kilovat-saata yaxın itirilmiş elektrik enerjisinin 34,8 min manatdan artıq istehlak dəyəri bərpa edilmişdir. Həyata keçirilmiş məqsədyönlü tədbirlər nəticəsində həmin məbləğlə yanaşı ötən ildən yaranmış debitor borcların da müəyyən hissəsinin ödənişi təmin edilmişdir.
Müəssisənin yağ tutumlu avadanlıqlarının yanğın təhlükəsizliyi təmin edilmiş, elektrik hava xətlərinin mühafizə zonalarının və transformator məntəqələrinin quru otlardan və kənar əşyalardan, transformatorların özülü və gövdəsi çirkli yağ örtüyündən təmizlənmişdir.
Bölmənin digər xəbərləri
