DÜNYA
QAZAXISTAN ƏHALİSİNİN 65 FAİZİ DÖVLƏT DİLİNİ BİLİR
AZƏRTAC-ın müxbiri Almatıdan xəbər verir ki, noyabrın 14-də burada “Qazaxıstan etnoslararası razılıq modeli: təcrübə və tövsiyələr” mövzusunda beynəlxalq konfrans açılmışdır. Forumda Qazaxıstanda yaşayan millətlərin dövlət dilini mənimsəməsi məsələsinə toxunulmuşdur. Qazaxıstanın mədəniyyət naziri Düsen Kaseinov konfransdakı çıxışında diqqətəlayiq bir fakt göstərərək bildirmişdir ki, ölkə əhalisinin 65 faizi dövlət dilini bilir.
Onun sözlərinə görə, Qazaxıstanda yaşayan 18 etnosun nümayəndələrinin 60-80 faizi dövlət dilini bilir. Bu göstərici koreyalılar arasında 28 faiz, yəhudilər arasında 17, polyaklar arasında 9,9 faizdir. Nazir demişdir ki, analitiklər dövlət dilinə münasibəti öyrənmək üçün bütün millətlərin nümayəndələri arasında sorğu keçirmişlər. Sorğu iştirakçılarının 69 faizi dövlət dilini öyrənmək istədiklərini bildirmişlər.